YAP Prezidentin ad günündə konfrans keçirir
Bu gün Bakıda Yeni Azərbaycan Partiyası tərəfindən “Gələcəyin ünvanı: Prezident İlham Əliyevin islahatlar strategiyası” adlı konfrans keçirilir.
Ölkə.Az-ın məlumatına görə, tədbirdə çıxış edən Yeni Azərbaycan Partiyasının (YAP) sədr müavini-icra katibi, Baş nazirin müavini Əli Əhmədov deyib ki, XX əsrin sonlarında Azərbaycanda iqtisadi tənəzzülün qarşısının alınmasında ulu öndər Heydər Əliyevin böyük rolu olub:
"Ümummilli liderin səyi nəticəsində ölkə iqtisadiyyatı inkişaf edib. Azərbaycan inkişafla dünyaya qüdrətini sübut etdi. Ölkəmiz yeni iqtisadi inkişafın astanasındadır. Bununla bağlı konsepsiya işlənib hazırlanmaqdadır. Bu, Azərbaycanın yenidən inkişafına təkan verəcək. Ümummilli lider Heydər Əliyev Azərbaycanın gözəl gələcəyini arzu edirdi. Hazırda isə Prezident İlham Əliyev onun ideyalarını həyata keçirir".
Ə.Əhmədov qeyd edib ki, Azərbaycanın əvvəlki inkişafı necə şərəfli olubsa, gələcək inkişafı da o cür olacaq:
"Azərbaycan dünyada iqtisadi inkişafına görə 200 dövlət arasında 77-ci yeri tutur".
Çıxışının sonunda Baş nazirin müavini Prezident İlham Əliyevi 55 yaşı tamam olması münasibətilə təbrik edib.
Daha sonra Maliyyə Bazarlarına Nəzarət Palatası publik hüquqi şəxsin Direktorlar Şurasının sədri Rüfət Aslanlının çıxışı başlayıb.
Maliyyə Bazarlarına Nəzarət Palatası publik hüquqi şəxsin Direktorlar Şurasının sədri Rüfət Aslanlı isə deyib ki, Azərbaycanda qeyri-neft sektorunun inkişafı 2 dəfə artıb. Onun sözlərinə görə, regionların iqtisadi inkişafı getdikcə artır:
"Azərbaycanda hər 100 evdən 62-də kompüter, 100 nəfərdən 77-nin isə internetə birbaşa çıxış imkanı var. Bu çox böyük göstəricidir. Dünyada gündə 1000-dək iş yeri bağlanır. Bir çox ölkələrdə 2008-2015 illərdə xeyli iş yerləri ixtisar olunub. Azərbaycanda işsizlik azalıb. Son illər yeni iş yerləri açılır və bu proses davam edəcək. Ölkəmizdə iş yerlərinin 72 faizi regionlarda açılıb. Bu insanların gəlirlərinin dayanıqlı formalaşmasını təşkil edir”.
R.Aslanlı vurğulayıb ki, Azərbaycanda orta təbəqə 29 faizə çatıb:
“Bu göstərici dünyada 14 faizdir. İqtisadiyyyatla bağlı yol xəritələri hazırlanıb. Hesab edirəm ki, 2017-ci ilin bu günüdə strategiyanın uğurları barədə danışacağıq”.
Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov qeyd edib ki, Azərbaycan brendi olan "ASAN Xidmət" dünya miqyasında özünü təsdiq edib.
Onun sözlərinə görə, “ASAN Xidmət" korrupsiya ilə mübarizə sahəsində uğurlu modeldir:
"Dünya ölkələri korrupsiyaya qarşı mübarizə ilə bağlı model fikirləşir. Azərbaycan, artıq bu modeli tətbiq edir. Elektronlaşma dövlətin prioritet sahələrindən biridir. “ASAN Xidmət" dövlət xidmətlərinin göstərilməsi sahəsində yenilik tətbiq edir. İndiyədək 13 milyon vətəndaşın müraciətinə baxılıb”.
İ.Kərimov vurğulayıb ki, indiyədək səyyar avtobuslarla 1 milyon vətəndaşın müraciətinə baxılıb:
"Vətəndaşlara xidmət üçün “ASAN qatar” sisteminin yaradılması nəzərdə tutulub".
Daha sonra tədbirin rəsmi hissəsi başa çatıb.
Zaur Əziz
