Tramp ABŞ-ın siyasətini demontaj etməyə başlayıb

Ancaq Tramp İngiltərənin baş naziri Tereza Mey ilə görüşdən sonra keçirilən mətbuat konfransında bildirib ki, biz hələ Rusiyaya qarşı tətbiq olunan sanksiyaların ləğvi barədə danışmaq istəmirik. Bu mövzudan danışmaq tezdir. Lakin ümid edirəm ki, ABŞ bütün ölkələrlə olduğu kimi, Rusiya ilə də yaxşı münasibətdə olacaq. Düzdür, hələlik bu baxımdan irəliləyiş yoxdur, lakin biz münasibətləri düzəldə bilsək, bu hər iki dövlət üçün yaxşı olar.

ABŞ Rusiya münasibətləri və sanksiyaların ləğvi barədə politoloq Qabil Hüseyinli Ölkə.Az-a danışıb:

"Dövlətlərarası münasibətlərdə hər iki tərəf bir-birinə qarşı addım atmalıdır ki, tərəflər arasında müəyyən kompromis və konsesnsus əldə edilsin. ABŞ tərəfi münasibətləri bərpa etmək, sanksiyaları ləğv etmək və Rusiyaya doğru hərəkət etmək istəyir. Rusiya da ABŞ-a qarşı hərəkət etməlidir.

ABŞ hesab edir ki, Rusiya öz ətrafındakı kiçik dövlətlərə qarşı qorxu və şantaj siyasəti həyata keçirir. Bu yolla özünün nüfuz dairəsini genişləndirməyə çalışır. ABŞ Rusiyanı dünyada qeyri-stabillik mərkəzi kimi görür. Bütün bunlara görə ABŞ Rusiyaya qarşı müxtəlif sanksiyaların tətbiq edilməsinə gərar verib. Barak Obama hakimiyyətinin son günlərində Rusiyaya qaşı sanksiyaların müddətini uzatdı və yeni sanksiyalar təbiq etdi.

Tramp isə bu sanksiyaların ləğvi haqqında söz-söhbət yaratmağa başlayıb. Hətta guya sərəncamın hazır olması barədə mətbuata xəbər sızdırılıb. İngiltərənin baş naziri Tereza Mey Vaşinqton səfərində Trampı Rusiya ilə ehtiyatlı olmağa çağırdı. Sanksiyaların ləğvi barədə yayılmış söz-söhbətləri eşidən 11 nəfər Nobel mükafatı mükafatçısı Trampa qarşı çox kəskin bəyanatla çıxış etdi.

Tramp ABŞ-ın indiyənə qədər yeritdiyi siyasəti yavaş-yavaş demontaj etməyə başlayıb. Meksika ilə qarşdurma yaranıb, Çinlə münasibətlər pisləşib. Müsəlmanların ABŞ-a miqrasiyasının qarşısını almaq üçün sərəncam imzalayıb. İranla bağlı məslələrin yenidən nəzərdən keçiriləcəyini və İrana qarşı sanksiyaların daha da gücləndiriləcəyini deyib. Tramp dünyanın geoplitik mənzərəsini aydın təsəvvür edə bilmir".

Səxavət Məmməd
Ölkə.Az