\"ABŞ-ın İrana qoşun yeritməsi mümkün deyil\"

İranın ballistik raketləri sınaqdan keçirməsi ABŞ-ı narazı salıb və Vaşinqton rəsmi Tehrandan bu sınaqları dayandırmağı tələb edir. İran tərəfi isə raketlərin sınağının davam edəcəyini bildirib.

ABŞ prezidenti Tramp bildirib ki, biz dəfələrlə İrana bu barədə xəbərdarlıq etmişik. Buna baxmayaraq, Tehran rəhbərliyi xəbərdarlıqlara məhəl qoymur. Biz İranı bu əməlindən daşındırmağın yollarını axtarırıq. Ən birinci variant isə hərbi həmlədir.

Trampdan sonra isə məsələyə ABŞ prezidentinin milli təhlükəsizlik üzrə köməkçisi Maykl Flinn də münasibət bildirib və deyib ki, biz rəsmi olaraq İrana xəbərdarlıq edirik. İran ABŞ və onun müttəfiqlərini təhdid etməyə davam edir. Rəsmi Tehranın hərəkətlərini Yaxın Şərq regionunda təhlükəsizlik və sabitliyin pozulmasına cəhd kimi qiymətləndiririk.

İran ABŞ münasibətləri barədə politoloq İlqar Vəlizadə Ölkə.Az-a danışıb:

"Bu hal-hazırda siyasi ritorikadır. İnanmıram ki, ABŞ İrana qoşun yeridəcək, hansısa hərbi əməliyyata start verəcək. Bu mümkün olan bir şey deyil.

Bütün hallarda siqnal bəllidir və ABŞ-ın Yaxın Şərq və İrana qarşı siyasəti dəyişilir. Ancaq ABŞ-ı buna vadar edən İran və onun hərəkətləri deyil. Məsələyə kompleks baxmaq lazımdır. Məsələyə ABŞ-İsrail münasibətləri prizmasından baxanda görünür ki, ABŞ regionda müttəfiqlərinə yenidən nəzər yetirmək və özünə yeni müttəfiqlər tapmağa çalışır. Bundan əlavə, ABŞ özünə yeni hədəflər də seçir. Bu hədəflərin kimliyi bəllidir.

ABŞ son illərdə ənənəvi olan İŞİD, Bəşər Əsəd kimi hədəflərdən başqa yeni hədəf kimi İranı götürüb. ABŞ İran siyasəti ilə ilk növbədə regionda öz mövqeyini möhkəmləndirmək istəyir. Bu siyasətin konkret əlamətlərini yaxın aylarda görəcəyik. ABŞ yaxın aylarda İrana qarşı daha ciddi sanksiyalar tətbiq edə bilər".

Səxavət Məmməd
Ölkə.Az