İvanişvili teleaparıcı olacaq

Keçmiş baş nazir oğlunun telekanalında veriliş aparmaq fikrindədir.

Ölkə.Az "Amerikanın səsi"-nə istinadən xəbər verir ki. Gürcüstanın sabiq baş naziri Bidzina İvanişvili telekanallardan birində həftəlik analitik veriliş aparmaq fikrindədir. İvanişvili bunu ölkədə baş verənləri cəmiyyətin ehtiyacı olan "düzgün analiz" şəklində təqdim etmək istəyir.

Gürcüstanda bütün müxalif qüvvələri birləşdrərək "Gürcüstan arzusu" adlı koalisiya altında birləşdirən və 2012-ci ildə Saakaşvilinin partiyası üzərində qələbə qazanmağı bacaran milyarder İvanişvili tezliklə oğlu gənc reper Beranın rəhbəri olduğu telekanalda analitik veriliş aparacağını təsdiq edib.

"Bu analitik veriliş olacaq və mən tezliklə bazar günləri bu verilişi üç ekspertlə aparacam. Cəmiyyətə düzgün analiz təqdim etmək lazımdır. Biz cəmiyyətin ölkədə baş verənlərin düzgün mənzərəsini təsvir etməsinə və hər hadisəyə obyektiv və düzgün qiymət verməyə kömək edəcəyik. Mən siyasətçilərin yanında dayanaraq hadisələri düzgün analiz etməyə kömək edəcəyəm. Bununla cəmiyyət bütün olaylarla doğru qiymət verəcək", - deyə, İvanişvili müsahibəsində bildirib.

Xatırladaq ki, Bidzina İvanişvili 2012-ci ilin oktyabrından 2013-cü ilin noyabrınadək Gürcüstan hökumətinin başçısı olub.

Rəşid Mustafazadə

Ölkə.Az