Ermənistandan köçürülən azərbaycanlılar dədə-baba torpaqlarına qaytarılır?
Görüşdə tərəflərin ikitərəfli əməkdaşlığın perspektivlərini, Dağlıq Qarabağ münaqişəsinin nizamlanması məsələsi də daxil olmaqla, regional və beynəlxalq gündəliyin əsas aspektlərini müzakirə edəcəkləri deyilir.
Cəbhədə baş verən son gərginliklər və ABŞ-ın ATƏT-in Minsk qrupundakı keçmiş həmsədiri Ceyms Uorlikin Dağlıq Qarabağ münaqişəsinin həlli ilə bağlı səsləndirdiyi bəyanat Lavrovla Məmmədyarovun görüşünü daha da maraqlı edir.
Xarici işlər nazirlərinin görüşünü və Ceyms Uorlikin bəyanatını politoloq Mübariz Əhmədoğlu "Ölkə.Az"-a şərh edib:
"ABŞ-ın ATƏT-in Minsk qrupundakı keçmiş həmsədri Ceyms Uorlikin maraqlı bir açıqlaması oldu. Keçmiş həmsədrin prosesə müdaxilə etməsi özü diqqətçəkən məsələdir. Ceyms Uorlik verdiyi bəyanatında bildirdi ki, dekabrın sonunda vəzifəmi təhvil verəndə çox maraqlı bir təklif var idi. Onun sözlərinə əsasən sözügedən təklif bütövlükdə regionda vəziyyəti yaxşılaşdıra biləcək. Eyni zamanda Ceyms Uorlik qeyd etdi ki, bu təklif reallaşsa, Ermənistan cəmiyyətinin əsası dəyişəcək.
Ermənistan mono etnik cəmiyyətdir. Ermənilər etnikləri və başqa millətlərin nümayəndələrini, başqa dinlərə inananları qovub, ancaq özləri qalıb. Belə başa düşülür ki, həmsədrlər Ermənistana təklif edirlər ki, Dağlıq Qarabağ münaqişəsini tənzimləmək çətindir, ona görə də, Ermənistan Azərbaycan münasibətlərinin normallaşmasına başqa bucaqdan yanaşaq. Əslində Dağlıq Qarabağ məsələsi başlayan ilk dövrlərdə təxminən 230 min azərbaycanlı Ermənistan SSRİ-dən deportasiya olundu. İnsanların evi-eşiyi, varı-yoxu əlindən alındı, hamısı qovuldu. Azərbaycanda da ermənilər yaşayırdı. Onlar da bu məsələ ortaya çıxan zaman mülklərini satıb getdilər.
Ceyms Uorlikin nəzərdə tutduğu məsələ tənzimləmədə yeni mərhələdir. Düşünürəm ki, Lavrov Ermənistanın xarici işlər naziri Edvard Nalbandyanla da bu məsələni müzakirə edib və bu gün də Azərbaycanın Xarici işlər naziri Elmar Məmmədyarovla da bu məsələni müzakirə edəcək. Həmsədrlər Bakıya səfər edəcək. Onlar Ermənistandan qovulan azərbaycanlıların öz torpaqlarına geri dönməklə bağlı Azərbaycanın mövqeyini dəqiqləşdirmək istəyirlər. Bundan əlavə, vaxtilə Azərbaycanı tərk edən ermənilərin geri qayıtmasına rəsmi Bakı zəmanət verə bilərmi?
Düşünürəm ki, yaxın zamanda prezidentlərin 3 tərəfli formatda görüşü təşkil ediləcək".
Atəşkəs rejiminin pozulmasına gəldikdə isə politoloq bildirdi ki, atəşkəs rejiminin pozulmasında ancaq Ermənistan özü iştirak edir:
"Ermənistan özünü elə aparır ki, guya atəşkəsi pozan Rusiyadır. Bütün hallarda atəşkəs rejiminin pozulmasında Ermənistan maraqlıdır. Ermənistan çalışır ki, Azərbaycanı Rusiya ilə, ABŞ-la qorxutsun. Bizim mətbuat yazır ki, atəşkəs rejimi Rusiyanın əli ilə pozuldu. Qətiyyən elə deyil. Atəşkəsi Ermənistan özü pozur və elə göstərir ki, guya bu kiminsə sifarişidir".
Səxavət Məmməd
Ölkə.Az
