\"Baş verənləri türk düşmənçiliyinə bağlamaq düzgün deyil\"

Tərəflər artıq ittihamları keçib, bir-birini diplomatik etikadan kənar sözlərlə, ifadələrlə təhqir edirlər.

Türkiyə tərəfi Hollandiyaya 2 nota verib. Diplomatik böhran artıq getdikcə böyüyür.

Baş verən son hadisələrlə bağlı politloq Adıgözəl Məmmədov fikirlərini Ölkə.Az-la bölüşüb:

"Ümumiyyətlə baş verən son hadisələr heç də ürəkaçan məsələlər deyil. Əlbəttə ki, Azərbaycan və Türkiyə münasibətləri strateji və səmimi müstəvi üzərində formalaşıb. İstəməzdik ki, Türkiyə hər hansı bir istiqamətdə zərər çəksin. Müəyyən bir məsələlər var ki, bunlara aydınlıq gətirmək lazımdır.

Bir məsələni başa düşmək lazımdır ki, hər bir dövlətin özünün daxili nizam-intizamını tənzimləyən qanunvericilik məcəllələri olur. Hollandiya qanunvericiliyənə görə, istənilən halda ictimai tədbirlərin həyata keçirilməsi rəsmi icazə ilə həyata keçirilməlidir. Niyəsə bu məsələdə bu qanunu unuduruq. Hesab edirik ki, Türkiyəyə qarşı haqsızlıq olub.

Mitinqlər Türkiyənin daxili məsələsi olan bir propaqandadır. Hətta Türkiyənin özündə də müəyyən dairələr ölkədə baş verən son islahatlardan razı deyillər. Türkiyə cəmiyyəti bu istiqamətdə iki yerə bölünüb. Bu Türkiyənin daxili problemidir. Azərbaycan dövlətində də ictimai tədbirlər qanunvericiliyə uyğun olaraq həyata keçirilir. Özümüzə rəva görmədiyimizi başqasına rəva bilməyək.

Belə bir tendensiya formalaşıb ki, Türkiyəyə qarşı qısqanclıq var. Hər bir dövlətin özünün həm regional, coğrafi, strateji, geopolitik maraqlar prinsipləri var. Hər bir dövlət öz maraqları çərçivəsindən məsələyə yanaşır. Baş verənləri türk düşmənçiliyinə bağlamaq düzgün deyil. Bu sadəcə olaraq siyasi proseslərdir. Bu proseslərə də birmənalı şəkildə qiymət vermək düzgün deyil".

Son baş verənlərin nə ilə nəticələnəcəyi məsələsinə gəldikdə isə politoloq bildirdi ki, bütün simlərin qırılacağını hesab etmirəm:

"Müəyyən dövr qarşılıqlı ittihamlar səslənəcək, ola bilsin diplomatik skandal vəziyyəti yaransın. Ancaq bu məsələlər müəyyən dövrdən sonra öz axarına düşəcək. Hər hansısa bir siyasi elitanın mövqeyi dövlətlər arası münasibətlər müstəvisinə oturmamalıdır. Türkiyə Rəcəb Tayyib Ərdoğan, Binali Yıldırım demək deyil. Türkiyəni Avropaya bağlayan tarixi keçmiş var. Qarşılıqlı əlaqələr var. Bu belə də dava edəcək".

Səxavət Məmməd
Ölkə.Az