İlin sonunda əfv gözlənilir

Dünya Azərbaycanlılarının Həmrəylik günündə - 31 dekabrda növbəti əfv fərmanı verilə bilər. "Qafqazinfo" xəbər verir ki, “Yeni Müsavat”a daxil olan məlumatda deyilir ki, əfv siyahısında yalnız bağışlanma üçün prezidentə müraciət edən siyasi məhbusların adları olacaq. Hazırda belə siyasi məhbusların sayı 9-dur. Onların çoxu NİDA Vətəndaş Hərəkatının həbsdəki üzvləridir.

Qaynağımız bildirib ki, hakimiyyət sabiq səhiyyə naziri Əli İnsanovu da azad etmək istəyir. Bu barədə əvvəllər də yazılıb. Hazırda Əli İnsanovla intensiv danışıqlar getmir - lakin ona zamanında edilən təkliflər hələ də qüvvədədir. İnsanov əfv ərizəsi yazmalı, daha sonra isə müalicə adı ilə ölkədən çıxmalı, uzun müddət mühacirətdə qalmalıdır. Qeyd edək ki, hazırda eyni davranışları həbsdən prezident əfvi ilə çıxmış sabiq nazir Fərhad Əliyev həyata keçirir.

Ölkə mediasından da məlum olduğu kimi, hüquq müdafiəçisi Sahib Məmmədov keçmiş səhiyyə naziri Əli İnsanovun azadlığa buraxılacağı haqda yayılan məlumatlardan danışıb.

İnsan Hüquqları üzrə Birgə İşçi Qrupunun üzvü olan S.Məmmədov deyib ki, Əli İnsanovun azadlığa buraxılacağı ilə bağlı yayılan məlumatların əsası yoxdur: “İşçi Qrupunda hamının məsələsi müzakirə oluna bilər, amma bununla bağlı tövsiyə verilib-verilməməsi məsələsi var. Əli İnsanov barəsində heç bir qərar qəbul etmək mümkün deyil.

O, nə vaxtından əvvəl şərti azad olunmaq üçün məhkəməyə şikayət verir, nə də əfv üçün müraciət edir. Bu hüquqi prosedurlardan ən azı biri olmalıdır ki, Əli İnsanovun məsələsinə baxılsın. Olmadığı halda, onunla bağlı hökumət nə qərar qəbul edə bilər ki?” S.Məmmədov əlavə edib ki, Birgə Qrupa iki yeni üzv qəbul olunub: “Yeni üzvlərdən biri daxili işlər nazirinin müavini - Baş Təşkilat-İnspeksiya İdarəsinin rəisi, polis general-leytenantı Fazil Quliyev, digəri isə hüquq müdafiəçisi Əvəz Həsənovdur”.

Ə.İnsanov siyasi motivlərlə dəmir barmaqlıqlar arxasına salınan ən stajlı məhbusdur. Oktyabrın 19-da onun həbsinin 9-cu ili tamam oldu. YAP-ın qurucularından biri olan Əli İnsanov 2005-ci ildə tutulub, iqtisadi cinayətlərdə təqsirli bilinərək 11 il müddətinə azadlıqdan məhrum edilib. 2013-cü il martın 14-də İnsanovla bağlı qərarını açıqlayan Avropa İnsan Hüquqları Məhkəməsi sabiq nazirin işgəncə və ədalətli məhkəmə hüququ üzrə iddialarını təmin edib. Qərara əsasən, Azərbaycan hökuməti İnsanova 10 min avro kompensasiya da ödəməlidir. Ötən ilin noyabrında Ali Məhkəmə Əli İnsanovun işinə dair Bakı Apelyasiya Məhkəməsi və Ali Məhkəmənin qərarlarını ləğv edib. İşə dair Ağır Cinayətlərə dair İşlər üzrə Məhkəmənin qərarı dəyişdirilməyib və araşdırılmaq üçün Bakı Apelyasiya Məhkəməsinə göndərilib. Məhkəmə sabiq nazirin barəsində olan hökmün dəyişdirilmədən saxlanılması qərarını veriblər. Ə.İnsanov bu qərara “məni sındıra bilməyəcəksiniz” nidası ilə reaksiya verib.

Ölkə.Az