"Tramp Əsədi heyvan adlandırsa da, Rusiya ABŞ-la danışıqlara hazırdır"

Danışıqlardan sonra Rusiya xarici siyasət idarəsinin rəhbəri Sergey Lavrov bildirib ki, terrora qarşı mübarizədə ABŞ-la əməkdaşlıq edəcəklər. Lavrov ABŞ və Rusiyanın dostluğunu dünyanın uğuru adlandırıb.

NATO rəhbərləri ilə görüşdən sonra isə ABŞ prezidenti Donald Tramp, çox ABŞ-Rusiya münasibətlərinin yaxşı olmasını istədiyini dilə gətirib.

Yaxın Şərqdə, o cümlədən Koreya yarımadasında vəziyyətin gərgin olduğu bir məqamda ABŞ-Rusiya dialoqunun baş verənlərə təsiri maraqla gözlənilir.

ABŞ-Rusiya dialoqu, problemlərin iki dövlətin münasibətlərinə təsiri və digər məsələlərlə bağlı politloq İlqar Vəlizadə fikirlərini Ölkə.Az-la bölüşüb:

"Tillersonun Moskva səfəri olmalı idi və Rusiya tərəfi onu qəbul etməyə bilməzdi. Çünki, həftələr öncə bu səfərlə bağlı danışıqlar gedirdi. Bu və ya digər şəkildə Tillersonun səfəri planlaşdırılan səfər idi. Bu səfərdə danışıqların əsas mövzusu Suriya problemi olsa da, digər mövzular da var idi. Rusiya-ABŞ münasibətlərinin gündəminə Suriya mövzusu çox ciddi təsir edir, ancaq tərəflər başa düşürlər ki, təkcə Suriya ilə kifayətlənmək olmaz. Maraqlar daha genişdir. Tərəflər istəyirlər ki, Suriya faktorunu öz siyasətlərində minimum səviyyəyə endirsinlər. Bu artıq özünü biruzə verir.

Ciddi insanlar heç vaxt Rusiya-ABŞ müharibəsindən danışmayıblar. Nə Rusiya, nə də ABŞ siyasi rəhbərliyi bu müharibənin real olmasından danışmayıblar. Suriyada gedən proseslərə tərəflər əks reaksiya göstərir. Tillersonun səfərindən öncə ABŞ prezidenti Donald Tramp çıxışında Əsədi heyvan adlandırdı. Bu heç də səfərin reallaşmasına mane olmadı. Əgər doğrudan da Rusiya Əsəd rejimini qeyri-şərtsiz dəstəkləsə idi, inanmıram ki, bu ifadədən sonra Tillersonun Rusiya səfəri mümkün olardı. Bu o deməkdir ki, Rusiyanın öz maraqları var. Tramp Əsədi heyvan adlandırsa belə, Rusiya ABŞ-la danışmağa hazırdır.

Düşünürəm ki, Suriyada kimyəvi hücum Əsəd tərəfindən həyata keçirilib. Bunu ABŞ da, Rusiya da başa düşür. Sadəcə olaraq Rusiya istəmir ki, ABŞ Əsədi təkləsin. Bu məsələdə Rusiyanın öz siyası planları var. Eyni zamanda Rusiya istəyir ki, Suriya məsələsinin Əsəddən asılılığını minimuma endirsin".

Ukrayna məsələsinin ABŞ və Rusiya münasibətlərinə təsiri məsələsinə gəldikdə isə politoloq qeyd etdi ki, Tillerson özü Ukraynaya görə Rusiya ilə münasibətlərin korlanmasını düzgün hesab etmədiyini deyib:

"ABŞ başa düşür ki, bu böhranda tərəflərin münasibətinə Ukrayna məsələsi əyləc rolu oynaya bilməz. Çox güman ki, sanksiya rejimi davam edəcək. Hər iki tərəf çalışacaq ki, sanksiya rejimi ABŞ-Rusiya münasibətlərinə çox ciddi təsir etməsin. ABŞ və Rusiya başa düşür ki, dialoq vasitəsi ilə problemi həll etmək olar. Burada müharibədən söhbət gedə bilməz. Bu o demək deyil ki, həm ABŞ, həm Rusiya öz planlarından əl çəkəcək. Rusiya Krımı təhvil verməyəcək. ABŞ isə NATO qoşunlarını Şərqi Avropaya yerləşdirir. ABŞ da bu siyasətindən əl çəkməyəcək. Bununla belə soyuq müharibə dövründəki kimi ABŞ-Rusiya münasibətləri davam edəcək. ABŞ-la SSRİ dostluq etmirdi, ancaq dialoq qururdu və bu dialoq əsasında hansısa məsələlər həll olunurdu".

Şimali Koreya məsələsinə gəldikdə isə İlqar Vəlizadə bildirdi ki, Şimali Koreyanın hərəkətlərinə hətta Çin belə narazıçılıq edir:

"Çin Şimali Koreyanın hərbi nüvə proqramından narazıdır. Düşünürəm ki, burada dialoq daha intensiv şəkildə gedə bilər. Çünki Rusiyanın əsas müttəfiqi Çindir. Əgər Çin də Şimali Koreyanın hərəkətlərindən narazıdırsa, bu narazıçılıq Rusiyaya da bu və ya digər şəkildə təsir edir. Burada hər 3 tərəf, həm Çin, həm Rusiya, həm də ABŞ Şimali Koreyadan narazıdırlar, onların bu narazılığı əməkdaşlığa daha çox şərait yaradır".

Səxavət Məmməd
Ölkə.Az