"Bişkek protokolunun məqsədi münaqişəni Rusiya xarici siyasətinin alətinə çevirmək idi"

Sənədə əsasən müharibə dayandırlıb, sonra isə Böyük sülh sazişi imzalanmalı idi. Ancaq 23 ildir ki, protokolla bağlı yalnız atəşkəs məsələsinə əməl olunub.

Bişkek protokolu, onun məqsədi və müəmması barədə politoloq Zərdüşt Əlizadə Ölkə.Az-a danışıb:

"Bişkek protokolunun bir məqsədi var idi - münaqişənin qaynar fazasını dondurub, onu Rusiya xarici siyasətinin uzunmüddətli alətinə çevirmək. Bu məqsədinə Bişkek protokolu çatıb. Geniş hərbi əməliyyatlar dondurulub. Xırda əməliyyatlar isə görüntü xatirinədir və hər iki dövlətin əhalisini itaətdə, qorxuda saxlamaq üçündür.

Rusiya istəyinə çatıb, münaqişəni dondurub və iki dövləti və bütövlükdə bölgəni nəzarətdə saxlayır".

Bişkek protokolunu imzalayan tərəflərin kimliyi məsələsinə gəldikdə isə politoloq qeyd etdi ki, Bişkek protokolu ənənəvi imzalanma prosesindən keçməyib:

"Bişkek protokolunu imzalayan tərəflərin kimliyi bəlli deyil. Erməni tərəfi iddia edir ki, bu protokolu 3 tərəf imzalayıb - Dağlıq Qarabağ, Azərbaycan və Ermənistan. Üstəlik Rusiya bu protokolun həyata keçirilməsində qarantdır. Azərbaycan tərəfi isə bildirir ki, Dağlıq Qarabağ tərəfi bu protokolu imzalamayıb.

Erməni tərəfi ortaya bir sənəd qoyub, ancaq həmin sənəddə Azərbaycan tərəfinin imzası yoxdur. Sazişdə bir tərəfin imzası olmayan sənəd isə keçərsizdir.

Azərbaycan tərəfi də ortaya sənəd qoyub və həmin sənəddə Dağlıq Qarabağın imzası yoxdur.

Bunlar hamısı siyasi oyundur. O zaman da, indi də Dağlıq Qarabağın siyasi rəhbərliyi Rusiyanın cəsuslarıdır və onların göstərişləri ilə hərəkət edirlər".

Bişkek protokolunun əsas məqsədinə gəldikdə isə Zərdüşt Əlizadə bir daha vurğuladı ki, bu protokolun imzalanmasında əsas məqsəd münaqişəni Rusiya xarici siyasətinin alətinə çevirmək idi və bu məqsədinə çatdı.

Səxavət Məmməd
Ölkə.Az