\"Rusiya bu məsələyə qərəzli yanaşır\"

Bu məsələ ölkəmizin həm ictimaiyyətində, həm də siyasətçilər arasında qəzəbə səbəb olub. Millət vəkilləri və ictimaiyyət nümayəndələri Rusiyanın atdığı bu addımı kəskin tənqid edib.

Baş verən bu hadisə ilə bağlı Diasporla İş üzrə Dövlət Komitəsi də bəyanatla çıxış edib. Bəyanatda deyilir ki, bu qərar iki ölkə arasında strateji tərəfdaşlıq münasibətlərinin ruhuna, xalqlarımız arasındakı çoxəsrlik dostluq əlaqələrinin mahiyyətinə tamamilə ziddir. Azərbaycan və Rusiya arasında faydalı əməkdaşlıq əlaqələrinin sürətlə inkişaf etdiyi, xalqlarımızın və dövlətlərimizin qarşılıqlı dəstəyə daha çox ehtiyacı olduğu bir dövrdə qəbul olunmuş bu qərar ölkələrimiz arasında uzun illər ərzində formalaşmış etimada kölgə sala bilər.

Rusiya tərəfinin atdığı bu addımla bağlı politoloq İlqar Vəlizadə "Ölkə.Az"-a danışıb:

"ÜAK-ın qeydiyyatının ləğv edilməsi fəsadsız ötüşməyəcək. Bütün hallarda bu, Azərbaycan ictimaiyyəti tərəfindən xoşagəlməz, qərəzli mövqe kimi qiymətləndiriləcək.

Burada müəmmalı məsələlər də çoxdur. Rusiya Ədliyyə nazirliyi iddia edirdi ki, bu qurumun nizamnaməsində ciddi nöqsanlar var. Hüquqi cəhətdən Rusiyada fəaliyyət göstərə bilməz. Bu təşkilat 15-16 ildir ki, Rusiyada fəaliyyət göstərir, nədənsə təşkilatın nizamnaməsində qanun pozuntuları Rusiya Ədliyyə nazirliyinin yadına ötən il düşüb. Sual yaranır ki, bundan öncə niyə bu nöqsanlar aşkar edilmirdi?

ÜAK-da struktur dəyişikliyi aparıblar. Ötən ilin dekabr ayında Moskvada qurultay keçiriblər. Qurultayda təşkilat əsasnamələrinə dəyişiklik edilib. Təşkilat dəyişikliklər etdikdən sonra Rusiya Ədliyyə nazirliyi fikrindən niyə daşınmadı? Bu da çox maraqlı sualdır. Bu suallar açıq qalır. Bu suallara cavab almadıqca biz əlbəttə ki, Rusiyanın bu məsələyə qərəzli yanaşdığını deyə bilərik. Əgər qanundan danışırıqsa, təşkilat apelyasiya məhkəməsinə şikayət etməlidir və yaxud yenidən qeydiyyatdan keçməlidir. Əgər yenə də qərəzli münasibət olsa, onda hansısa nüfuzlu dairənin sifarişi həyata keçirilir deməkdir.

Bu məsələ təkcə ictimaiyyətin marağında olmamalıdır. Eyni zamanda, Xarici işlər nazirliyi tərəfindən də bu məsələyə münasibət bildirilməlidir. Ümumiyyətlə, bu məsələ dövlətin nəzarəti altında olmalıdır. Çünki bu siravi bir təşkilat deyil, kitab mağazası deyil. Bu təşkilat iki ölkə, cəmiyyət arasında kifayət qədər nüfuzlu olan bir təşkilatdır. Bunu nəzərə almaq lazımdır".

Səxavət Məmməd
Ölkə.Az