ABŞ Ukraynaya maliyyə yardımı ayırdı

ABŞ hökuməti sərhədin qorunması və nəzarətin gücləndirilməsi üçün maliyyə ayırıb.

Ölkə.Az İnterfaksa istinadən xəbər verir ki, ABŞ Ukraynaya 320 milyon dollar maliyyə ayırıb. Ağ Evin mətbuat xidmətindən bildirilib ki, Ukraynaya yardım məqsədilə 2014-cü ilin mayında ayrılmış milyard dollarlıq kreditə əlavə olaraq 320 milyon dollar köçürülüb.

Məlumatda qeyd olunur ki, ABŞ hökuməti sərhədin qorunması və nəzarətin gücləndirilməsi, eyni zamanda, ukraynalı hərbçilərin təlimatlandırılması üçün 118 milyon dollar ayırıb.

Bu yardıma müxtəlif hərbi geyim ləvazimatları və qurğuların təqdim olunması nəzərdə tutulub.

Xatırladaq ki, dünən ABŞ-ın vitse-prezidenti Ukrayna prezidenti və baş naziri ilə görüş keçirib. Co Bayden Pyotr Poroşenko və Arseniy Yatsenyukla müzakirələrdən sonra Rusiyanın Ukraynadakı əməllərini pisləyərək təcavüzkarlıq kimi qiymətləndirib. Vitse-prezident müzakirələrdə Ukraynanın süverenliyi və ərazi bütövlüyünə olan təhlükələrdən söz açıb.

Rəşid Mustafazadə

Ölkə.Az