"Əgər Ermənistan ağıllanmasa, Azərbaycan tərəfi düşmənə ən ağır zərbələr endirəcək"

Azərbaycan tərəfi düşmənə məxsus bölmənin mühafizə olunan komanda müşahidə məntəqəsi və müşahidə qülləsini məhv edib. Bir müddətdir ki, xüsusən rusiyalı ekspertlər Qarabağ cəbhəsində vəziyyətin gərginləşəcəyini proqnoz edirdilər. Hətta bəzi eksperlər genişmiqyaslı döyüşlərin başlayacağını da iddia edirdi. Ekspertlərdən fərqli olaraq Rusiya və Qərb Qarabağda yenidən müharibənin başlamasını istisna edir, hər iki tərəfi sülh danışıqlarını davam etdirməyə çağırırlar.

Cəbhədəki gərginliklə bağlı hərbi ekspert Üzeyir Cəfərov fikirlərini "Ölkə.Az"-la bölüşüb:

"ATƏT-in Minsk qrupunun həmsədrləri regiona səfər edənə qədər cəbhədəki vəziyyət bu tempdə də davam edəcək. Ola bilsin ki, gərginlik daha da artacaq. Gərginliyin genişmiqyaslı əməliyyatlara keçib-keçməməsi Ermənistanın davranışlarından asılı olacaq. Əgər Ermənistan ağıllanmasa, sözsüz ki, Azərbaycan tərəfi düşmənə ən ağır zərbələr endirəcək. Azərbaycan Respublikası Müdafiə Nazirliyi də xəbərdarlıq edib ki, Azərbaycan ordusu düşmənin bütün hərəkətlərini izləyir. Dünən və bu gün Xocavənd, Füzuli istiqamətində Azərbaycan ordusu erməni ordusunun müşahidə məntəqəsini, atəş nöqtəsini məhv edib. Düşmən o dərəcədə ağlını itirib ki, yenə də iri çaplı silahlardan istifadə edir. Azərbaycan Respublikası Müdafiə Nazirliyi orduya düşmənin canlı qüvvəsi, texnika və avadanlığını sıradan çıxarmaq barədə göstəriş verib.

Dünən düşmənin atəş nöqtəsinin vurulmasından sonra Ermənistan tərəfi bəyanat verərək bildirdi ki, Ermənistan Müdafiə Nazirliyi cəbhədəki vəziyyətlə bağlı hər gün məlumat verməyəcək. Bu açıqlama o anlama gəlir ki, erməni tərəfi itkiləri gizlətmək istəyir. Ermənistan tərəfi itkilərini açıqlamaq məcburiyyətindədir, çünki Azərbaycan tərəfi ortaya konkret fakt qoyur. Erməni tərəfinin bu bəyanatı onların ölən və yaralanan əsgərləri ilə bağlı məlumatı gizlətmək üçün nəzərdə tutulub".

Hərbi ekspert qeyd etdi ki, ATƏT-in Minsk qrupunun həmsədrləri bölgəyə səfər edənə qədər ehtiyatlı olmalıyıq:

"Son zamanlar düşmənin fəallığı hiss olunur. Müdafiə Nazirliyinin kəşfiyyat və döyüş əməliyyatları şöbəsi cəbhədəki vəziyyəti incələyib, müdafiə nazirliyinin rəhbərliyinə təqdim etməlidir. Düzgün incələnmələr aparılmasa, Azərbaycan tərəfini bir sıra istiqamətlərdə çətinliklər gözləyir".

Səxavət Məmməd
Ölkə.Az