Vurğun Əyyub: "Siyavuş Novruzov illərdir eyni sözü deyir"

Yeni Azərbaycan Partiyasının (YAP)icra katibinin müavini, deputat Siyavuş Novruzov son açıqlamasında İqtidarın müxalifətlə dialoqa və əməkdaşlığa həmişə hazır olmasını dilə gətirib.

Ölkə.az-a danışan Müsavat başqanının sabiq I müavini Vurğun Əyyub millət vəkili Siyavuş Novruzovu illərdir eyni sözü deməkdə günahlandırıb və bunların ancaq sözdə olduğunu bildirib.

"Siyavuş Novruzov illərdir eyni sözü deyir. Sözdə dialoq tərəfdarı kimi çıxış etsə də, əməldə isə tamam əksinə gedir. Müxalifət ümummilli məsələlərdə hər cür dialoqa hazır olması barədə öz mövqeyini bildirib. Hər iki tərəf əgər doğrudan da fikrini bəyan edirsə, onda niyə addım atmırlar? Hesab edirəm ki, bu məsələlərlə hakim partiya və yaxud hakimiyyət özü konkret addımlar atmalıdır. Sözlərlə cəmiyyəti aldatmağa gərək yoxdur".

Qeyd edək ki, müxalifətin bir qolu ilə YAP-ın müəyyən məsələlərdə fikir mübadiləsinin aparıldığını, görüşlərin keçirildiyini deyən millət vəkili Siyavuş Novruzov bunun, əsasən parlamentdə təmsil olunan partiyalar olduğunu bildirmişdir.

Fatimə İbrahimova
Ölkə.az