İranda baş verən terror Suriya, yoxsa Qətər məsələsindən qaynaqlanır?

Baş verən terror aktları İran parlamentinin və Xomeyninin məqbərəsinin qarşısında həyata keçirilib. Terror aktları nəticəsində 12-a yaxın şəxs öldürülüb. İranda baş verən terror aktlarının məsuliyyətini İŞİD terror qruplaşması öz üzərinə götürüb.

Cənub qonşumuzda baş verən terror aktları ilə bağlı Fazil Mustafa və İqbal Ağazadə fikirlərini "Ölkə.Az"-la bölüşüblər:

Millət vəkili, Böyük Qurtuluş Partiyasının sədri Fazil Mustafa: "Terrorçu qruplaşmalar artıq müxtəlif ölkələrə - Filippinə qədər gedib çıxıbsa, Londonda hansısa terror aktları törədirlərsə, demək ki, bu, beynəlxalq, ciddi qurulmuş bir şəbəkədir və konkret nəticələrə hesablanmış işlər görürlər.

İranda terror aktının baş verməsi artıq həm də İranın sabitlik ölkəsi olmamasının göstəricisidir. Özünə arxayın olan ölkələrdən biri də İran idi. İndiyənə qədər Türkiyədə, Rusiyada, Avropada terror aktları törədilirdi, ancaq İranda bu tip hadisələr olmurdu. Ancaq indi görünən odur ki, heç bir dövlət terrordan sığortalanmayıb. Terrorla mübarizədə birlikdə strategiya həyata keçirmək vacibdir. Bu İran üçün də müəyyən dərəcədə dərs olar ki, Türkiyə daxilində kürd qruplaşmalarının hansısa bir terror əməllərinin genişlənməsinə rəvac verən dövlət, indi özündə bu halla üz-üzə qalıb. Ona görə də, bu məsələlər ətrafında baş verən hadisələr İranın dərs çıxarması üçün bir əsasdır. İran Türkiyə ilə birlikdə terrorun aradan qaldırılması üçün səylərini artırmalıdır".

Ərəb ölkələri Qətərlə diplomatik əlaqələrini kəsib. İran isə Qətərə hər cür dəstək nümayiş etdirir. Baş verən terror hadisəsinin bu məsələ ilə bağlılığına gəldikdə isə millət vəkili qeyd etdi ki, bu inandırıcı deyil:

"Qətərə İranla yanaşı Türkiyə də dəstək verir. Qətərin ümumi izolyasiya olunmasında müəyyən mənada şübhəli məqamlar da var. İranda baş verən terror aktları Qətər məsələsi ilə əlaqəli deyil. Bu məsələnin sadəcə olaraq İranın Suriyadakı tutduğu mövqeyə görə olması daha böyükdür".

Ümid Partiyasının sədri İqbal Ağazadə: "Terrorun məsuliyyətini İŞİD terror qruplaşması üzərinə götürüb. İŞİD-in bu terror aktını üzərinə götürməsi normal haldır. Adətən harada nə isə baş verəndə terror təşkilatları özlərini daha böyük göstərmək üçün məsuliyyəti öz üzərlərinə götürürlər.

İŞİD-in üzərinə götürdüyü terror işinin hələlik doğurdanmı İŞİD-in planlaşdırdığını, həyata keçirdiyini dəqiq demək olmaz. Fakt odur ki, İŞİD-in bu terror aktını həyata keçirmək ehtimalı böyükdür. Buna səbəb isə İranın istər Suriyada, istər də İraqda İŞİD-ə qarşı əks cəbhədə dayanması və hərbi birləşmələri vasitəsi ilə döyüşməsidir. İŞİD-in bunu həyata keçirməsi təbii bir hal ola bilər".

İqbal Ağazadə İŞİD-lə yanaşı Qətər məsələsinin də bu terror aktında rol oynadığını iddia edir:

"Qətər məsələsi bu gün Yaxın Şərqin ən aktual problemlərindən biridir. Qətər iki dövlət - İran və Türkiyə üzərindən bu prosesləri tənzimləməyə çalışır. Baş vermiş terror aktını daha çox Qətər üzərindən baş verən proseslərlə əlaqələndirərdim. Hesab edirəm ki, Qətərin təklənməsinə görə İranın siyasətinə qarşı İranın neytral qalmasına çalışırlar. Yaxın Şərqdə ciddi proseslər gedir, yeni düzən yaradılır. Nə əldə ediləcək, nələr baş verəcək onu demək tezdir, ancaq 2019-cu ilə qədər bu kimi proseslər daha intensiv davam edəcək. Terrordan heç bir ölkə sığortalanmayıb. Terrorun Yaxın Şərq ölkələrinin ən sakit hissəsinə yayılmasını da çox rahatca gözləmək mümkündür".

Səxavət Məmməd
Ölkə.Az