ABŞ Əsəd rejimindən intiqam alır
Azərbaycanlı siyasətçilər düşünürlər ki, koalisiya qüvvələri bundan sonra da Əsəd tərəfdarlarını vurmaqda davam edəcəklər. Politoloq Adıgözəl Məmmədov “Ölkə.Az” açıqlamasında bildirib ki, bu gün baş verənlər əslində böyük güc dövlətlərinin bir-biri ilə müharibəsidir.
“Bu gün hansısa region üzrə marağı olan dövlətlərin üz-üzə gəlməsələr də, gizlin müharibəsi gedir. Bəşər Əsəd əslində bir görüntüdür. Suriya meydanı əslində Orta Şərqin yenidən bölüşdürülməsi üçün bir yoldur. Yəni Suriya münaqişəsi bitdikdən sonra Orta Şərqdə sabitlik yaranmayacaq. Faktiki olaraq bu gün Suriya müharibəsində böyük dövlətlər mübarizə aparırlar”, - deyə siyasətçi bildirib.
A. Məmmədov hesab edir ki, əslində Bəşər Əsəd hallandırılası bir tərəf də deyil: “Əsəd bir görüntüdür. Bu görüntünün öz maraqları var. Əgər bu maraqlar müəyyən sabit nöqtəyə gəlməyibsə, deməli tərəflər arasında razılaşma yoxdur. Yəni Suriyada hələlik bölgü aparılmayıb. Bəşər Əsəd tərəfdarlarının bombalanması Suriya məsələsinin həlli deyil”.
Politoloq, millət vəkili Araz Əlizadə düşünür ki, bu addım ilə ABŞ yenə də hegemonluğunu sübut etmək istəyir.
“Bu məsələ “Canavar və quzu” təmsilinə bənzəyir. Həmin təmsildə canavar quzuya deyir ki, “sənin günahın ondadır ki, mən yemək istəyirəm”. Suriya ordusunun günahı ondadır ki, onlar ABŞ-a tabe olmurlar. Rusiya Bəşər Əsədə kömək edir. Bu səbəbdən də onu devirə bilmirlər”, - deyə deputat bildirib.
Araz Əlizadə deyir ki, ABŞ təhlükəsizlik zonalarının yaradılmasını alqışlayır, eyni zamanda artıq üçüncü dəfədir Suriya ordusuna zərbələr endirir.
“Amerika qeyri-qanuni olaraq gəlib başqa ölkənin ərazisində oturub. Bununla belə, deyir ki, həmin ölkənin qanuni ordusunun hərəkəti gələcəkdə bizə təhlükə törədə bilər. Heç kim deyə bilməz ki, bir dəfə də olsun Suriya ordusu Amerika qüvvələrinə zərbələr endiriblər. Belə bir şey yoxdur. Bəşər Əsədi devirə bilmirlər. Amma orada sülh olmasına da imkan verməyəcəklər”.
Siyasətçi Qabil Hüseynli isə düşünür ki, Bəşər Əsəd ABŞ-a tabe olmadığı üçün cəzalandırılır.
“Rakka istiqamətində Suriyanın hərbi qüvvələri müəyyən əməliyyatlara qoşulub və bəzi yerləri bombardıman edib. Əsəd rejiminin bombardıman etdiyi əsas hədəflər Suriya kürdləri, Peşmərgə qüvvələri olub. Bu əməliyyatlarla Suriya ordusu Amerikaya bir növ “göz dağı” vermək istəyiblər. Bu məsələdə Rusiyanın da rolu az deyil. Bəşər Əsəd rejiminin günahları həddindən artıq çoxdur. Suriya ölkəsi bir adamın hikkəsi ucbatından yandırılıb. İndi Amerika bu bölgədəki nəzarətini artırmaq üçün bütün vasitələrdən istifadə edir. ABŞ Rakka şəhərini terrorçulardan almaq üzrədir. Suriya ordusu bu döyüşlərə müdaxilə edə bilmir. Amerika bununla da Rusiyanın Suriya hökümranlığına imkan vermir”, - deyə Qabil Hüseynli bildirib.
Politoloq Zərdüşt Əlizadə isə hesab edir ki, ABŞ-ın bu addımı beynəlxaql hüquqlara ziddir.
“BMT-nin üzvü olan suveren dövlətə qarşı əməliyyat aparılır. BMT-nin qərarı olmaqdan bu ölkəyə xarici qüvvələr soxulur. Amerika başda olmaqla bu dövlətlər Suriyada istədiklərini edirlər. Bu beynəlxalq hüququn tam pozulması deməkdir. Koalisiya qüvvələri terrorla mübarizə adı altında Suriyaya giriblər. Lakin özləri terrorla mübarizə aparan ordunu vururlar. Bu Amerikanın riyakar siyasətidir. Hazırda güc onlardadır, qanunu saymırlar. Bu zaman da zəif qüvvələrə iki çarə qalır. Belə qüvvələr terrorçuluğun genişlənməsinə rəvac verirlər. Bəzi qüvvələr də, onları Allaha tapşırırlar. Düşünürlər ki, Tanrı onların cəzasını verəcək. Tanrı onlara cəza verəcək, ya verməyəcək, bu hələ bəlli deyil”, - deyə Z.Əlizadə bildirib.
Siyasətçi düşünür ki, Amerikanın Əsəd rejimini devirmək cəhdləri uğursuz olacaq: “Amerika neçə ildir Bəşər Əsədi hakimiyyətini çevirmək istəyir. Hələ buna nail ola bilməyiblər. Suriyada bir çox qüvvələr Əsəd rejimini dəstəkləyir. Bundan əlavə Rusiya, İran bu rejimi dəstəkləyir. Düşünürəm ki, bu səbəbdən də, ABŞ hələ də Əsəd rejimini məhv edə bilməyəcək”.
Ziya Səccad
Ölkə.Az
