Qənirə Paşayevadan Ermənistana sərt cavab

"Ölkə.Az" xəbər verir ki, millət vəkili üzünü erməni nümayəndələrinə tutaraq "siz işğalçı ölkənizdən danışın"- deyib. 

Millət vəkili Q.Paşayeva bu gün AŞPA-da Avropada miqrantlarla bağlı məruzənin müzakirəsi zamanı çıxış edib və Azərbaycan əleyhinə böhtanlarla çıxış edən Ermənistan nümayəndə heyətinə sərt cavablar verib: "Dəyərli həmkarlarım, mənim ölkəm dünyada ən çox qaçqın qəbul edən ölkələrdən biridir. Bilirsiniz ki, Ermənistanın Azərbaycan torpaqlarının 20 faizini işğal etməsi nəticəsində 1 milyondan çox azərbaycanlı öz evində köçkün düşdü. İşğalçı Ermənistan bu gün azərbaycanlı köçkünlərin öz evlərinə dönməsinə izn vermir. AŞPA da daxil olmaqla, beynəlxalq təşkilatların qərarlarına, qətnamələrinə məhəl qoymayan Ermənistan rəhbərliyi işğalçılığı və qeyri-insani əməllərini davam etdirir. 

Mən buradan bir az öncə Azərbaycan əleyhinə yalanlarla dolu çıxış edən Melkumyana səslənərək demək istəyirəm ki, sizin yalanlarınıza ən gözəl cavab1416 saylı qərar da daxil olmaqla bu Assambleyanın, Parlament Assambleyasının qəbul etdiyi qərarlardır. O qərarlarda birmənalı olaraq ölkənizin işğalçı olduğu vurğulanır və işğala son vermənizə çağırış edilir. İşğala son verin. 

Əziz həmkarlarım, biz burada Assambleyamızda köçkünlərlə bağlı müzakirələrdə nəticələrdən daha çox insanları köçkün salan səbəblərlə mübarizə aparmalıyıq. İnsanları köçkün salan səbəblərə qarşı AŞPA-nın, üzv ölkələrin birlikdə mübarizəsi güclənməsə, köçkünlərin sayı da, problemlər də azalmayacaq, daha da artacaq. Ona görə Assambleyamızı insanları köçkün salan səbəblərə qarşı daha sərt mübarizəyə çağırırıq.

Hikmət
Ölkə.Az