Ziyafət Əsgərov: “Azərbaycanda məhkəmə sisteminə kölgə salmaq istəyənlər var\"

“Ölkə.Az”-ın məlumatına görə, bunu Milli Məclisin birinci vitse-spikeri Ziyafət Əsgərov Parlamentin bu gün keçirilən növbədənkənar iclasında çıxışı zamanı deyib.

O bildirib ki, AİHM-nın rəsmi statistikalarına baxdıqda Avropa ölkələri ilə bağlı qəbul edilən qərarların sayının Azərbaycanla bağlı qəbul edilən qərarların sayından çox olduğunu aydın şəkildə görmək olur.

Z.Əsgərovun sözlərinə görə, Avropa İnsan Hüquqları Məhkəməsinin rəsmi statistikasında baxanda görünür ki, 2016-cı ildə Azərbaycanla bağlı 16 qərar qəbul olunub, ancaq Avropa ölkələri ilə bağlı qərarların sayı 40-dan çoxdur. Z.Əsgərov əlavə edib ki, Azərbaycanın məhkəmə sistemində aparılan islahatlar uğurla davam etdirilir.

Z.Əsgərov qeyd edib ki, Azərbaycanda məhkəmələrə göstərilən diqqət bu sahəyə inamı artırıb.

Onun sözlərinə görə, bunun nəticəsində məhkəmədə işlərin sayı xeyli artıb:

“Hakimlər işlərinin vəzifəsindən layiqincə gəlməyə çalışırlar. Lakin bütün bunlara baxmayaraq, yeni çağırışları nəzərə alaraq hakimlərin iş yükünün azaldılması istiqamətində qanunvericilik islahatları davam edir. Ölkə başçısının sərəncamı əsasında məhkəmə sisteminin elektronlaşması nəticəsində vətəndaşlar elektron sistemlə məhkəməyə müraciət edə bilirlər. Vətəndaşlarımız yeni sistem əsasında şəxsi kabinet yaratmaqla məhkəmələrə ərizələri verir, məhkəmə rüsumlarını belə elektron qaydada ödəyə bilirlər. Ölkəmizdə 9 məhkəmə üçün yeni bina inşa olunur”.

Birinci vitse-spiker əlavə edib ki, ötən dövrdə hakimlərin sayı 2 dəfə artırılsa da, Azərbaycanda 100 min nəfərə 6 hakim düşür:

“Lakin bu rəqəm Avropa ölkələrində 20-dir. Bu baxımdan ölkəmizdə də hakimlərin sayının artırılmasına ehtiyac var”.

Vasif Həsənli
Ölkə.Az