\"Lokal müharibənin və əməliyyatların keçirilməsi üçün bütün şərait var\"

Baş verən hadisənin Cocuq Mərcanlıya əhalinin köçürüldüyü gün baş verməsini ekspertlər əhali arasında xof salmaq niyyətindən irəli gəldiyini bildirirlər. Xarici işlər nazirlərinin görüşü ərəfəsində bu hadisənin baş verməsi və dərhal sonra ATƏT-in tərəfləri sülh danışıqlarına dəvət etməsi Azərbaycan tərəfinə təsir kimi dəyərləndirilir. ATƏT hazırki status-kvonun saxlanılmasında maraqlıdır.

Baş verən hadisə və hadisənin gələcək inkişafını politoloq İlqar Vəlizadə "Ölkə.Az"-a şərh edib:

"Erməni hərbi-siyasi hakimiyyəti son zamanlar dəfələrlə deyirdi ki, onlar Azərbaycanın hərbi obyektləri ilə yanaşı, sosial-ictimai obyektləri, infrastrukturları hədəf alıblar. Hətta Cocuq Mərcanlıya insanlar köçsə, oranı da vuracaqlarını bildirmişdilər. Ermənistanın hərbi-siyasi rejiminin aqressiyası Azərbaycanın təkcə hərbi-siyasi strukturlarına qarşı yox, mülki əhalisinə də qarşı yönəlib. Ermənilər açıq etiraf edirlər ki, onlar təkcə Azərbaycan dövləti ilə yox, sivil azərbaycanlılarla da müharibə aparırlar. Bu çox vacib bir nüansdır. Azərbaycan hakimiyyəti həmişə deyir ki, biz ermənilərlə yox, Ermənistanın hərbi-siyasi rejimi ilə müharibə edirik, erməni xalqı isə burada zərərçəkəndir. Bu son hadisələr göstərir ki, Ermənistan hakimiyyəti mülki şəxsləri, hətta uşaqları belə hədəfə alır. Ermənistanın siyasəti dəyişilmir, 25 il bundan əvvəl necə idisə indi də elədir. Xocalıda və digər rayonların işğalında ermənilər dinc əhalini qırırdılar. Serj Sərkisyan, tərəfdarları və havadarları Birinci Qarabağ müharibəsində necə terror törədirdilərsə, indi də bu terroru davam etdirirlər. 25 il bundən əvvəl onlara təzyiq göstərilmirdi, indi də heç kəs təzyiq göstərməyəcək". 

ATƏT-in tutduğu mövqeyə gəldikdə isə politoloq bildirdi ki, ATƏT-in tutduğu mövqe yanlış və səhvdir:

"ATƏT-in səyləri ona yönəlməyib ki, vəziyyəti kökündən dəyişdirsin. Onların əsas məqsədi illər öncə necə idisə indi də elədir: vəziyyəti olduğu kimi saxlamaq və tərəfləri mənasız danışıqlara sövq etmək. Belə vəziyyət davam edə bilməz. Azərbaycan tərəfi buna sakit yanaşmayacaq, adekvat addımlar atılmalıdır. Bu addımların necə addımlar olacağını da başa düşürük. Əsas məqsədimiz düşmənin mövqelərini susdurmaq və tamamilə sıradan çıxarmaq olmalıdır.

Aprel əməliyyatları zamanı qarşıya qoyulan tapşırıq torpaqları işğaldan azad etməklə yanaşı, ermənilərin hədəfində olan yaşayış məntəqələrini təhlükəsiz vəziyyətə çatdırmaq idi. Baş verənlər çox təhlükəli bir şeydir. Çünki Ermənistan öz siyasətindən əl çəkməyəcək. Bu barədə isə ATƏT düşünməlidir. Sanki heç nə baş verməyib, ATƏT-in bəyanatında həmin ifadələr, həmin sözlər yer alıb".

"Hazırki vəziyyət müharibə təhlükəsi yaradırmı?" sualına isə İlqar Vəlizadə belə cavab verdi:

"Mütləq mənada müharibə təhlükəsi var. Lokal müharibənin və əməliyyatların keçirilməsi üçün bütün şərait var. Son baş verənlər onu göstərir ki, Ermənistan terror siyasətindən əl çəkmir. Baş verənlər zəmin yaradır ki, Azərbaycan ordusu Ermənistan ordusunu neytrallaşdırsın".

Səxavət Məmməd
Ölkə.Az