Keçmiş nazir: “Bütün dünya erməni vəhşiliyinə lənət yağdırır”
Bunu “Ölkə.Az”-a açıqlamasında Azərbaycanın keçmiş xarici işlər naziri (1988-1992-ci illərdə) Hüseynağa Sadıqov bildirib.
Keçmiş nazir deyib ki, bütün dünya ictimiayyəti açıq şəkildə ermənilərin bu vəhşiliyinə qarşı çıxır, pisləyir və bunu edənlərə lənət yağdırır.
Onun sözlərinə görə, Füzulinin Alxanlı kəndində törədilən son hadisələrlə bağlı Qərb mediasında kifayət qədər erməni vəhşiliyini pisləyən xəbərlər yer alıb:
“Qərb mediasında müşahidələrim də onu deməyə əsas verir ki, heç kəs erməni vəhşiliyinə bəraət qazandırmır və qazandıra da bilməz. Bu hadisə həm də Dağlıq Qarabağ probleminin həlli istiqamətində Azərbaycan rəhbərliyinin həyata kerçirdiyi sülhpərvər səylərinə qarşı növbəti erməni təxribatıdır.
Günümüzdə bu cür qəddar vəhşiliyi bəlkə də yalnız Ermənistan rəhbərliyi törədir. Bu hadisədə biz erməni xalqını günahlandırmırıq. Bu vəhşiliyi Ermənistanın indiki hərbi və siyasi rəhbərliyi törədib”.
H.Sadıqov ATƏT-in Minsk qrupunun fəaliyyətini də tənqid edib:
“Burada ATƏT-in Minsk qrupunun da neçə ildir səmərəsiz fəaliyyətini söyləmək olar. Minsk qrupunda təmsil olunan dövlətlərin mənafeləri toqquşduğu üçün problemin həlli illərdir ki, yubanır. Belə davam etsə, Minsk qrupu heç nəyə nail ola bilməyəcək. Ona görə də biz öz gücümüzə və yaxın müttəfiqlərimizə arxalanaraq problemi həll etməliyik”.
Keçmiş nazir qeyd edib ki, Ermənistan rəhbərliyi Xocalıda günahsız insanlara qarşı həyata keçirdiyi cinayət əməllərini indi də davam etdirir.
Vasif Həsənli
Ölkə.Az
