Fuad Qəhrəmanlı: "Rauf Arifoğludan və Sərdar Cəlaloğludan öncə bu yolu Hafiz Hacıyev gedib"

Azər Ayxanın "Müxalifətin diktatorları..." adlı yazısında müəllif Əli Kərimlini ruh xəstəsi, manyak, Sərdar Cəlaloğlunun isə  AXCP sədrini "primadonna" adlandırmasına AXCP sədrinin müavini Fuad Qəhrəmanlı Ölkə.az-verdiyi açıqlamasında cavab verib.

Fuad Qəhrəmanlı: "Azərbaycan Xalq Cəbhəsinin ictimai rəydə mövqeyinin güclənməsi, hakimiyyətə tək alternativ kimi qəbul olunması təbii ki, hakimiyyəti ciddi surətdə narahat edir. Eyni zamanda paralel olaraq hakimiyyətlə iş birliyində olan, əvvəlki müxalif mövqeyini dəyişərək hakimiyyətin xidmətində olan partiyaların və media orqanlarının cəmiyyətdə ifşa olunması onlarda aqressiya yaradır. Bu aqressiyanı real müxalifəti nüfuzdan salmaqla, cəmiyyətdə ictimai rəyi çaşdırmaqla, çalışırlar ki, cəmiyyəti toz-dumana bürüsünlər və cəmiyyət əsl gerçəyin nədən ibarət olduğunu bilməsin. Ona görə də, onlar aqressivdirlər, artıq cəmiyyətdə onlara qarşı rəğbət yoxdur. Cəmiyyət onları satılmış simalar kimi qəbul edir.

Xalq Cəbhəsinin mövqeyinin güclənməsinə görə hakimiyyətin təsir dairəsinə keçmiş media orqanları və siyastçilər AXCP-nin üzərinə hücuma keçiblər. Bu bir sifarişdir. Bu hakimiyyət mətbəxindən gələn tezislərdir. Vaxtı ilə Siyavuş Novruzov hansı leksikonda danışırdısa, bu gün Rauf Arifoğlu eyni leksikonla danışır, Sərdar Cəlaloğlu bugün Siyavuş Novruzovdan daha çox Siyavuş Novruzova çevrilib.

Bu adamlar hansı düşərgədə yer alırlarsa, həmin düşərgənin dəyərlərini də mənimsəyirlər. Sərdar Cəlaloğlunun bu gün təhqirlə danışması, böhtançı rolunda çıxış etməsi, Rauf Arifoğlunun "Yeni Müsavat"ı hakimiyyətin tirbunasına çevirməsi onu göstərir ki, məhz Xalq Cəbhəsinə hakimiyyət tərəfindən hücum əmri verilib. Cəmiyyət təbii ki, səslənən fikirləri ciddi qəbul etmir. Rauf Arifoğlundan, Sərdar Cəlaloğludan öncə bu yolu Hafiz Hacıyev gedib. Cəmiyyətin Hafiz Hacıyevə münasibəti nədirsə onun yolu ilə gedənlərə də münasibəti o olacaq. Xalq Cəbhəsi bu məsələləri o qədər də ciddiyə almır. Bizim hədəfimiz mövcud hakimiyyətdir. Biz hakimiyytin tör-töküntülərinə qarşı deyil, onların özünə qarşı mübarizə aparırıq.

Hakimiyyətə tək alternativ AXCP olduğu üçün hakimiyyətə işləyənlərin aqresiyyası, təhqirləri daha da artacaq. Sərdar Cəlaloğlu siyasi məhbus olan qardaşının haqqını dilə gətirə bilmirsə, onun haqqında danışa bilmirsə, demək bu adam mənəvi simasını itirib. O, öz mənəviyyatını, prinsiplərini hakimiyyətin verdiyi güzəştlərə satıb".

Səxavət Məmməd
Ölkə.az