Politoloq: "ABŞ Azərbaycana tövsiyə vermək üçün mənəvi haqqını itirib"

ABŞ Dövlət Departamentinin sözçüsünün 1 dekabr 2014-cü il tarixində Azərbaycan haqqında səsləndirdiyi tənqidi fikirlərə Azərbaycan XİN sərt reaksiya verdi.

XİN-in bu bəyanatını politoloq Qabil Hüseyinli Ölkə.az-a şərh edib.

Qabil Hüseynli: "Qərblə Azərbaycanın münasibətlərinin pozulmasını istəmirəm. Amma indiyə qədər Amerika ikili standartlardan geniş istifadə edib. Dağlıq Qarabağ məsələsində təcavüzkarla təcavüzə məruz qalan ölkəyə az qala eyi standartları və hətta təcavüzkara daha çox məhəbbətini ifadə edib. Bu isə Dağlı Qarabağ münaqişəsinin həllində ciddi problemlər yaradır. Problemləri yaradan təkcə Rusiya deyil, həm də Qərbin müəyyən dairələridir. Xüsusi ilə Amerikadakı erməni, yunan lobbilərinin təsiri altına düşən siyasətçilərdir. İndi də ABŞ müəyyən məsələlərdə bizə xəbərdarlıq edir. Əlbəttə Azərbaycanın demokratiya və insan haqları sarıdan problemlərinin olduğunu etiraf etməliyik, ancaq bunu bizə Amerika diqtə şəklində söyləməməlidir. Amerika tövsiyyə şəklində nəyisə deyə bilər, amma bunu hədələmə, diqtə edici tonda, böyük dövlət ədası ilə etməməlidir. Azərbacan öz problemlərini gözəl bilir.

Belə məsələlərə Amerikanın qarışması üçün mənəvi haqq lazımdır. Bu mənəvi haqqı da Amerika Dağlıq Qarabağ məsələsi ilə bağlı sərgilədiyi mövqe ilə itirib. Bu məsələnin uzanmasında Amerikanın ikili standartları böyük rol oynayıb. Ona görə də, Azərbaycanın Xarici İşlər Nazirliyinin verdi nota Azərbaycan xalqının öz müstəqil inkişaf yolunun olduğunu təsdiqləyir. Bu məsələdə Azərbaycan bu cür bəyanatı verməli idi. Amma açığı belə sərt bəyanat gözləmirdim. Azərbaycan tərəfi həm Rusiyaya, həm də Amerikaya münasibətdə kifayət qədər ölçülmüş və biçilmiş siyasətə meyl göstərməlidir".

Səxavət Məmməd
Ölkə.az