Tural Abbaslı başqan müavinini təkzib etdi

"Müsavat" partiyasının üzvü, bu təşkilatın başqanlığına sabiq namizəd Qubad İbadoğlu “Azərbaycan Demokratiya və Rifah” (ADR) Hərəkatını yaratdı. Hərəkatın yaradılmasını "Müsavat" başqanının müavini Nüşabə Sadıqlı sərt şəkildə tənqid edib. Nüşabə Sadıqlı bu hərəkatın tapşırıqla yaradıldığını və Nizamnaməyə zidd olduğunu bildirib.

Məsələ ilə bağlı "Müsavat" partiyasının məclis üzvü və başqanlığa sabiq namizəd Tural Abbaslı Ölke.Az-da münasibətini bildirib. Tural Abbaslının fikrincə, Hərəkat və təşkilat yaratmaq müsavatçıların, həm də ora qoşulan digər şəxslərin hüququdur.

"Mən və ətrafımdakı şəxslər “Azərbaycan Demokratiya və Rifah” hərəkatında təmsil olunmayacağıq. Ona görə yox ki, hərəkatı qeyri-qanuni hesab edirik. Ona görə ki, biz fəaliyyətimizi indiki halda partiya daxilində göstərəcəyik.

İctimai təşkilat və hərəkatlarda təmsil olunan müsavatçıların hərəkətlərinin nizamnaməyə zidd olub-olmamasına gəldikdə isə, bu barədə birmənalı şəkildə nizamnamədə qeyd edilib ki, partiyanın üzvü istənilən hərəkat və təşkilatın sıralarına qoşula, lakin yalnız bir partiyanın, "Müsavat" partiyasının üzvü ola bilər. "Müsavat" partiyasının üzvü digər heç bir partiyanın üzvü ola bilməz.

Əgər müsavatçının təmsil olunduğu qurum partiyanın maraqlarına, mövqelərinə zidd gedərsə, o zaman orda təmsil olunan həmin şəxslərin fəaliyyətinə partiya daxilində nizamnamə çərçivəsində MNTK-da baxıla bilər.

Müsavatçıların hansısa başqa bir hərəkatda təmsil olunması nizamnaməyə qətiyyən zidd deyil. Partiyanın böyük əksəriyyəti müxtəlif təşkilat və hərəkatlarda təmsil olunurlar. Partiya daxilində QAT-ın üzvləri var, NİDA-nın üzvləri var, QHT rəhbərləri, QHT təmsilçiləri var.

Hərəkatın yaradılması yeni ideya deyildi. Qubad bəyin tərəfdarları işçi qrupu yaradandan sonra belə bir təklif bizə də gəlmişdi. Təklifdə partiyadan kənarda hərəkatın yaradılması da bildirilmişdi. Fraksiya ilə paralel bu təklif var idi. Biz o müzakirələrdə iştirak etmirdik. Biz o zaman da Qubad bəyə və tərəfdarlarına bildirdik ki, biz hərəkatın yaradılmasına pis baxmırıq, ancaq orda fəaliyyət göstərməyəcəyik. Bizim məqsədimiz partiyadaxili fraksiyanın yaradılması idi".

Səxavət Məmməd

Ölkə.Az