\"İsa Qəmbərə saxtakarlıq haqqında məlumat verdim, dedi məsələni şişirtməyin\"

"Müsavat" partiyasında qurultay bitsə də qurultayla bağlı söz-söhbətlər bitmək bilmir. Qubad İbadoğlu qurultay öncəsi və qurultay günü baş verən qanun pozuntularından danışıb. Qubad İbadoğlu müsahibəsində bildirib ki, "Partiyanın İcra Aparatının Təşkilat şöbəsinin müdiri Söhrab Məhərrəmov qurultay keçiriləcək Mədəniyyət Evinin qarşısında xüsusən regionlardan gələnləri saxlayıb, İsa Qəmbərin adından deyib ki, onun seçimi Arif Hacılıdır, onlar da Arif Hacılıya səs versinlər...". Qubad İbadoğlu seçkidə Arif Hacılı ilə deyil, İsa Qəmbərlə yarışmaq məcburiyyətində qalacaqlarını əvvəlcədən bildiklərini deyib.

Qubad İbadoğlunun səsləndirdiyi fikirlərə Vurğun Əyyub və Səxavət Əlisoydan dəstək gəlib.

Ölkə.az bu məsələ ilə bağlı Vurğun Əyyubun və Səxavət Əlisoyun açıqlamalarını sizə təqdim edir:

Vurğun Əyyub: "Qurultay günü qəbul edilmiş təlimatlara zidd hərəkətləri gördüm və bu barədə qurultay başlamamış qurultayın təşkilat komitəsinin sədri İsa Qəmbərə dedim ki, pozuntuların qarşısını alsın. İsa Qəmbər isə mənə "məsələni şişirtməyə ehtiyac yoxdur" deyərək məsələnin üstündən keçdi".

Səxavət Əlisoy: "Qubad İbadoğlunun dediklərinin şahidiyəm. Səhər tezdən qurultay başlamamış Arif Hacılının komandasında Söhrab Məhərrəmov adlı İcra aparatının hansısa departamentinin rəhbəri var, xüsusi ilə rayondan gələn qurultay nümayəndələrinə yaxınlaşıb, "İsa Qəmbər Arif Hacılıya səs vermənizi istəyir" deyə onları istiqamətləndirirdi. Yeri gəlmişkən bildirim ki, Arif Hacılının əvvəl rəhbər olduğu Mərkəzi İcra aparatı nizamnamədən kənar bir orqandır. Onun vəzifəsi nizamnamədən kənar olduğu kimi, şöbə müdürləri də nizamnamədən kənar vəzifələrdir. Başda Söhrab Məhərrəmov olmaqla Arif Hacılının icra aparatının üzvləri bütün qurultay nümayəndələrini qollarından tutub kənara çəkir və İsa Qəmbrin seçiminin Arif Hacılı olduğunu pıçıldayırdılar. Mən Söhrab Məhərrəmovun qolundan tutub dedim, "sən kimsən ki, İsa Qəmbərin adından təbliğat aparırsan?". Söhrab Məhərrəmov mənə dedi ki, narahat olmağa dəyməz Arif Hacılı artıq başqan seçilib. Ondan əvvəl isə Əbilfəz Elçibəyin doğum günündə, 24 iyunda Arif Hacılının qardaşı Vaqif Hacıbəyli fəxri xiyabanda mənə dedi ki, sentiyabr ayının 27-də mən partiyanın başqanı olacam.

Bunlar çox böyük saxtakarlığa getdilər və bizim də bundan xəbərimiz var idi. Arif Hacılının saxtakar dəstəsi bütün rayonlarda, hansı rayon sədri Arif Hacılı ilə yaxın idisə, həmin rayondan 15-20 nəfərin adı qurultay nümayəndəsi kimi siyahıya salınmışdı. Hansı rayon təşkilatının sədri və oradakı üzvlər Arif Hacılının əleyhinə idisə, onlar qurultaya həmin rayon təşkilatlarını buraxmırdılar, ya da həmin rayonlardan 3-4 qurultay nümayəndəsi seçirdilər. Qurultay öncəsi 16 rayon təşkilatı buraxılıb. Bunlar qurultaydan öncə etdikləri saxtakarlığa inanmayaraq qurultay günü İsa Qəmbərin adından qurultay nümayəndələrinə çağırış edərək oyun oynadılar.

Əgər həqiqətən bunu İsa Qəmbər tapşırıbsa, bunu onun vicdanına buraxıram. Qurultayda namizədlərə söz verilərkən, İsa Qəmbər namizədləri təqdim edərkən, bu səhnənin şahidi olmuş hər bir ağlı başında, intellekti olan şəxs o saat bilərdi ki, İsa Qəmbər kimi dəstəkləyir. İsa Qəmbər Arif Hacılını elə təqdim etdi ki, elə bil o, Lenin, Marks və ya Corc Vaşinqtondur. Qurultaydan öncə rayonlarda 7 nizamnamə pozuntusu baş vermişdi. Hətta Ədliyyə nazirliyi qurultayda saxtakarlıq elementlərinə ciddi yanaşarsa, qurultayın nəticələrini ləğv edə bilər.

Qubad İbadoğlu tamamilə haqlıdır. Saxtakarlıq olmasa idi Arif Hacılının maksimim 10-15% səsi ola bilərdi. Çünki, Arif Hacılı "Müsavat" pariyasında keçən illərini yüzdə-yüz ancaq intriqalara sərf edib. "Müsavat" partiyasındakı intiliqaların başında həmişə Arif Hacılı dayanıb. Bu qurultay uzun zaman müzakirə olunacaq. Bu qurultay "Müsavat" tarixinə qara bir ləkə kimi düşdü. Arif Hacılı saxtakar başqan kimi tarixə keçdi. Əminəm ki, yaxın zamanda ədalət bərpa olunacaq. Partiya son 10 ildə özünün durğunluq dövrünü yaşayır. Partiyada gurultulu alqışlar altında, məhəbbət dastanları danışılıb və partiyanın bütün məğlubiyyətləri qələbə kimi qələmə verilib".

Səxavət Məmməd
Ölkə.az