Ən yaxşı və ən pis mətbuat katibi kimdir?

Ölkə.Az "İlin ən yaxşı və ən pis mətbuat katibi kimdir?" sualı ilə bir sıra tanınmış sayt nümayəndələrinə müraciət edib. Cavabları olduğu kimi təqdim edirik:

Musavat.com-un baş redaktoru Xalid Kazımlı:

"Ən yaxşı mətbuat katibi Tanrıverdi Mustafayev ("Azərişıq) , Eldar Sultanov (Baş Prokurorluq), Pərvanə İbrahimova (BDU), Nəsimi Paşayev (Bakı Metropoliteni) və Daxili İşlər Nazirliyinin mətbuat xidmətinin rəis müavini Ehsan Zahidovdur. Ən pis mətbuat katibləri isə adlarını belə bilmədiklərimdir".

Ölkə.Az saytının şef redaktoru Amil Hacıyev:

"Ekologiya və Təbii Sərvətlər Nazirliyinin mətbuat katibi İradə İbrahimovanı, Bakı Metropoliteninin mətbuat katibi Nəsimi Paşayevi ən yaxşıların sırasında fərqləndirərdim. Əmək və Əhalinin Sosial Müdafiəsi Nazirliyinin mətbuat katibi Elman Babayevin, Dövlət Sosial Müdafiə Fondunun mətbuat katibi Əmrah Fəqanoğlunun, "Azəravtoyol"un mətbuat katibi Anar Nəcəflinin adını da bura daxil edərdim. Mətbuatla işləməyə maraqlı görünməyənlərin sırasında isə FHN-in mətbuat katibidir-Oqtay Bayramov.

Qaynar.info saytının baş redaktoru Zahir Əzəmət:

Ən Yaxşı mətbuat katibi Nəsimi Paşayev (Bakımetropoliteni) və Şəfa Mehmanqızıdır (Dövlət Nəqliyyat Xidməti).
Ən pis mətbuat katibi kimi isə "QaçqınKom"un mətbuat katibi Elçin Qədimovun adını çəkə bilərəm.

Milli.az internet portalının baş redaktoru Anar İmanov:

"Yaxşıların sırasında Əmək və Əhalinin Sosial Müdafiəsi Nazirliyinin mətbuat katibi Elman Babayevin, Dövlət Sosial Müdafiə Fondunun mətbuat katibi Əmrah Fəqanoğlunun, "Azəravtoyol"un mətbuat katibi Anar Nəcəflinin adını çəkə bilərəm. Digərləri barədə neç nə deyə bilmərəm".

Lent.az saytının baş redaktoru Qabil Abbasoğlu:

"Ən pis mətbuat katibləri çoxdur deyə, hamısının adını çəkmək istəmirəm. Ən yaxşıların siyahısında "Azərişıq"dan Tanrıverdi Mustafayev, "Azərsu"dan Anar Cəbrayıllı, DİN-dən Ehsan Zahidov, Bakı Metropolitenindən Nəsimi Paşayev, FHN-dən Oqtay Bayramovun adını çəkə bilərəm. Bunlarla mütəmadi işləyirik və heç bir narazılığımız yoxdur".

Bakıpost.az saytının baş redaktoru Elçin Zahiroğlu:

"Yaxşı və ya pis mətbuat xidməti rəhbəri dəyərləndirməsi indiki məqamda düzgün deyil. Pis mətbuat xidməti yoxdur, pis qurum, təşkilat rəhbəri var. Mətbuata açıq rəhbərin pis mətbuat xidməti ola bilməz. Həm də burada qurumun təyinatından və istiqamətindən də çox şey asılıdır. Məsələn, biz DTX-nın, Müdafiə Nazirliyinin mətbuat xidmətindən tutaq ki, Mədəniyyət və turizm və yaxud Ekologiya nazirliyinin mətbuat xidməti kimi mətbuata açıqlıq uma bilmərik.

Bütün bu məsələləri nəzərə alanda kimdir yaxşı mətbuat xidməti sualını vermək çətindir. Tez-tez görünən, təmsil etdiyi qurumla bağlı məlumatlara anında reaksiya verən mətbuat xidmətlərini sadalaya bilərik: Ekologiya və Təbii Sərvətlər Nazirliyindən İradə İbrahimova, "Azəravtoyol"dan Anar Nəcəfli, Əmək və Əhalinin Sosial Müdafiəsi Nazirliyindən Elman Babayev, Bakı Metropolitenindən Nəsimi Paşayev, “Azərişıq”dan Tanrıverdi Mustafayev, "Azəriqaz"dan İbrahim Kərbalayev, "Azərsu"dan Anar Cəbrayılov, Baş Prokurorluqdan Eldar Sultanov, Vergilər Nazirliyindən Şahin Məmmədov.

“Report” İnformasiya Agentliyinin şöbə redaktoru Pərvin Abbasov:

“Əməkdaşlarımız gün ərzində müxtəlif qurumlara müraciət edir. Gəldiyim nəticə odur ki, ən yaxşı mətbuat katibləri Ekologiya və Təbii Sərvətlər Nazirliyinin mətbuat katibi İradə İbrahimova, Milli Məclisin mətbuat xidmətinin rəhbəri Akif Təvəkküloğlu, Bakı Şəhər Baş Polis İdarəsinin Dövlət Yol Polisi İdarəsinin İctimai əlaqələr bölməsinin rəisi polis polkovniki Vaqif Əsədov, Gənclər və İdman Nazirliyinin mətbuat katibi Səmayə Məmmədova "Azərsu"nun mətbuat katibi Anar Cəbrayıllı, Baş Prokurorluğun mətbuat xidmətinin rəhbəri Eldar Sultanov, Dini Qurumlarla İş üzrə Dövlət Komitəsinin İctimaiyyətlə əlaqələr şöbəsinin Yaqut Əliyeva, Səhiyyə Nazirliyinin mətbuat katibi Liya Bayramova, XİN-in mətbuat xidmətinin rəhbəri Hikmət Hacıyev, Bakı Metropliteninin sözçüsü Nəsimi Paşayev, BDU-nun mətbuat katibi Pərvanə İbrahimovadır. Əmək və Əhalinin Sosial Müdafiəsi Nazirliyinin sözçüsü Elman Babayev də çalışqan sözçülərdəndir. FHN-in mətbuat xidmətinin rəhbəri hörmətli Oktay Bayramov isə adətən jurnalistləri yola verir. DSX-nın saytı operativ işləsə də, bu qurumun mətbuat katibinin kim olduğunu bilmirəm”.

Oxu.az saytının məsul redaktoru Elvin Əhmədov

"Mən işlədiyim sahələrdən danışa bilərəm. Ən yaxşı mətbuat katibi Gənclər və İdman Nazirliyindən Səmayə Məmmədovadır. Ümumilikdə isə ən pis mətbuat katibi Rabitə nazirliyinin mətbuat katibidir. Ünvanladığımız sualları çox zaman cavabsız qoyurlar".

Hazırladı: İntiqam VALEHOĞLU
Ölkə.Az