Yunanıstanın baş nazirindən Türkiyə açıqlaması: \"Bu məsələdə Ərdoğanla həmfikirik\"

Yunanıstanın baş naziri Kiryakos Miçotakisə dünyanın bir çox ölkəsinin, eləcə də Türkiyənin ən böyük problemlərindən biri olan köç dalğası ilə bağlı sual ünvanlanıb.

Ölkə.Az Türkiyə mətbuatına istinadla xəbər verir ki, “Reuters”ə danışan Miçotakis Türkiyənin Avropanın yeni köç dalğası ilə mübarizədə əhəmiyyətli tərəfdaş olduğunu bildirib. Baş nazir həmçinin bu məsələdə Türkiyənin dəstəyə ehtiyacı olduğunu söyləyib:

“Türkiyəni miqrasiya probleminin idarə olunmasında tərəfdaş kimi görürəm. Prezident Ərdoğanla çox açıq bir görüş keçirdik və düşünürəm ki, qaçqınları onlara mümkün qədər yaxın tutmağın vacibliyi barədə razılığa gəldik. Bəli, bu problemlə məşğul olmaq üçün Türkiyəyə dəstək vermək lazımdır. Digər tərəfdən, 2015-ci ildə gördüklərimizin təkrarlanmayacağını vurğulamaq istərdim. Bu hətta mümkün deyil. Bunun təkrarlanmaması üçün əlimizdən gələni edəcəyik " – baş nazir deyib.

Qeyd edək ki, 2015-2016-cı illərdə Suriyadakı müharibədən qaçan 1 milyondan çox qaçqın Türkiyəyə yerləşmişdi. Talibanın əfqanıstanda hakimiyyətə gəlməsindən sonra yei qaçqın axınının baş verməsi ehtimalı narahatlıq doğurur. 

Billurə Yunus