"İdmançılar və turistlər Azərbaycanı yenidən kəşf edəcəklər”

Bunu “Ölkə.Az”a açıqlamasında millət vəkili İqbal Məmmədov “Bakı-2019”Avropa Gənclər Yay Olimpiya Festivalı ilə bağlı mövqeyini açıqlayarkən deyib.

Onun sözlərinə görə, Bakı-2019”Avropa Gənclər Yay Olimpiya Festivalının Bakıda keçirilməsi əlbəttə ki, Azərbaycanın qazandığı mövqeyin, ölkəmizin dünyadakı çəkisinin, beynəlxalq ictimaiyyət və beynəlxalq təşkilatlar qarşısında nüfuzunun ifadəsidir:

“Belə tədbirlər Azərbaycan dövləti və xalqı üçün də mühüm dividentlər gətirir. Azərbaycanın ev sahibliyi edəcəyi növbəti mötəbər beynəlxalq yarış iyulun 21-dən 28-dək "Bakı-2019”Avropa Gənclər Yay Olimpiya Festivalıdır. Bu idman yarışı da Azərbaycanın maraqlarına cavab verən bir tədbirdir. Belə ki, bu yarış da Azərbaycan üçün bir çox məqamlar baxımından divident gətirəcək. İlk olaraq Azərbaycan və onun mədəniyyətinin, tarixinin, həqiqətlərinin dünyaya tanıdılması baxımından mühüm əhəmiyyət kəsb edir. Digər tərəfdən isə ölkəmizin iqtisadiyyatına, turizminin inkişafına öz müsbət töhfəsini verəcək”.

 Millət vəkili əlavə edib ki,  Azərbaycan artıq yarışa hazır vəziyyətdədir və yarış yüksək səviyyədə təşkil olunacaq: “Azərbaycan polisi və digər aidiyyatı qurumlar yarışların yüksək ictimai-asayişin təmin olunacağı  səviyyədə keçirilməsi üçün bütün lazımi tədbirləri görüblər. Yarışda iştirak edən idmançılar və digər insanlar Azərbaycanda əminamanlığın hökm sürdüyünü, biznesin və iqtisadiyyatın inkişafı üçün əlverişli şəraitin olduğunu göstərəcək. Qonaqlar Azərbaycanın bütün istiqamətlərdə özünün dinamik inkişaf modelinin şahid olacaqlar. Prezident İlham Əliyevin sözləri ilə desək, bu gün Azərbaycan dünya miqyasında elə də böyük dövlət deyil, lakin sözümüzün çəkisi böyükdür. Sözün həqiqi mənasında, ölkəmizin çəkisini, rolunu dünya siyasətində hər bir dövlət görür, qiymətləndirir, Azərbaycanı etibarlı tərəfdaş kimi dəyərləndirirlər. İdman yarışları bir daha göstərdi ki, Azərbaycan sürətlə inkişaf etməkdədir. Beynəlxalq tədbirlərin təşkilatçıları ev sahibliyi üçün o ölkələri seçirlər ki, orada sabitlik, təhlükəsizlik, əminamanlıq var və insan hüquqları təmin olunur. Həmin insanlar Avropanın bir hissəsi olan Azərbaycanın füsunkar gözəlliyinin şahidi olacaqlar. Hesab edirəm ki, bu yarışlarda iştirak edən idmançılar, onları izləməyə gələn on minlərlə turist Azərbaycanı yenidən kəşf edəcəklər”.

Mürtəza
Ölkə.Az