Oqtay Əsədov: “İşğal olunmuş ərazilərimizdə süveren hüquqlarımızın bərpasına nail olacağıq”
“Ölkə.Az”-ın məlumatına görə, iclası açıq elan edən Milli Məclisin sədri Oqtay Əsədov bildirib ki, gündəlikdə bir məsələ var:
“Milli Məclis Xocalı soyqırımının 25 illiyi ilə əlaqədar qərar layihəsini müzakirə edəcək”.
Gündəlik təsdiqlənəndən sonra parlament Xocalı soyqırımı qurbanlarının, Qarabağ şəhidlərinin, Azərbaycanın ərazi bütövlüyü və müstəqilliyi uğrunda mübarizədə şəhid olanların xatirəsi bir dəqiqəlik sükutla yad edilib.
Giriş nitqi ilə çıxış edən spiker tarixi ötən əsrin əvvəllərində Azərbaycan torpaqlarında, İrəvan, Göyçə, Zəngəzur qəzalarında, Dərələyəzdə erməni dövlətinin qurulduğunu, 80-ci illərin sonlarında isə 1 milyon yarımdan çox azərbaycanlının Ermənistan ərazisindən və işğal olunmuş Azərbaycan ərazilərindən qovulduğunu bildirib.
O.Əsədov deyib ki, Xocalı soyqırımının təşkilatçıları bölgədə öz maraqlarını həyata keçirmək istəyən qüvvələr, icraçıları isə Ermənistan olub:
“Xocalı soyqırımına qədər təkcə Qaradağlı kəndində 80 nəfərdən çox azərbaycanlı girov götürülərək işgəncələrlə öldürülüb. Xocalı soyqırımı Milli Məclisin qərarları ilə soyqırım kimi qəbul olunub. Həmçinin İslam Əməkdaşlıq Təşkilatı, bir sıra ölkələrin parlamentrləri Xocalı soyqırımını rəsmən tanıyıb, ABŞ-ın 21 ştatında bu dəhşətli soyqırım aktı ilə əlaqədar qərar qəbul olunub. Bu günlərdə Milli Məclisin üzvləri dünyanın bir sıra ölkələrində soyqırımla bağlı tədbirlərdə iştirak etməkdən ötrü ölkə xaricindədir. Azərbaycan öz ərazisinin bir hissəsinin işğalı ilə heç zaman barışmayacaq. Bu vəhşiliyi törədənlər layiq olduqları cəzalarına çatacaqlar. Biz əminik ki, gec-tez Azərbaycanın işğal olunmuş ərazilərində süveren hüquqlarımızın bərpasına nail olacağıq”.
Daha sonra Milli Məclis sədrinin birinci müavini Ziyafət Əsgərov qərar layihəsini oxuyub.
Zaur Əziz
Ölkə.Az
