AXTAR

Axtarışın nəticələri

Bütün nəticələr
17 Avqust 2017

Polkovnik: Orada elə oğlanlar şəhid oldu ki... — CƏBHƏDƏN REPORTAJ

27.06.2016 18:58 Bölmə: Ölkə Oxunma sayı: 9634
A- A A+

26 iyun Silahlı Qüvvələr günü münasibəti ilə Xocavənd rayonunda bayram tədbiri keçirildi

Bayramı əsgərlərimizlə birgə qeyd etmək üçün yollanırıq Xocavənd rayonuna.

Rayon ərazisi Qarabağ silsiləsində yerləşir. Ancaq rayonun dağlıq hissəsi ermənilər tərəfindən işğal edilib. Rayonun kiçik hissəsində qəsəbələr salınaraq Xocavənd sakinləri məskunlaşdırılıb. Bundan əvvəlki səfərlərimizdə Haramı düzündə olanda göz işlədikcə yaşıllıq görürdük. İndi isə o yaşıllığı boz çöl əvəz edib. Dovşanların qaçdığı düzü əqrəb və ilanlar zəbt edib.

Qəsəbələrdə yaşayan rayon sakinləri əkin-biçin və heyvandarlıqla məşğuldur. Qəsəbələri Azərbaycan bayraqları bəzəyib. Daima gülləbaranın altında olan camaat onsuzda hərbçilərdən heç nəyi ilə seçilmirlər. Ona görə də, 26 iyun Silahlı Qüvvələr günü həm də cəbhə xəttində yaşayan insanların bayramıdır.

Ölkə.Az Xocavənd rayonunda 26 iyun Silahlı Qüvvələr günü münasibəti ilə təşkil edilən bayram tədbirindən reportajı sizə təqdim edir:

Tədbir başlamazdan bir qədər əvvəl Beyləqan rayon sakini, aprel döyüşlərində xüsusi fəallıq göstərən və Talış yüksəkliyinin düşmən işğalından geri qaytarılması zamanı ağır yaralanan, Polkovnik Qədir Vəlişovla görüşürük. Qədir Vəlişov həm Əfqanıstan, həm də birinci Qarabağ müharibəsinin iştirakçısıdır.

Qədir Vəlişov danışmağı sevmir. Bildirir ki, sağ qalmağıma sevinmədim. Orada elə oğlanlar şəhid oldu ki, özümün sağ qalmağıma sevinə bilmədim. Özümü hələ də məğlub hiss edirəm.

- Niyə elə deyirsiniz? Ən azından Talış yüksəkliyinin geri qaytarılmasında iştirak edə bildiniz.

- Mən Şuşanın, İrəvanın azad edilməsində iştirak etmək istəyirdim...

Qədir Vəlişovla birlikdə bayram tədbirinin təşkil edildiyi yerə gəlirik. Burada keçmiş döyüşçülər, Beyləqan batalyonunun komandiri Akif Həsənov və Səməd Alyanlı ilə görüşürük. Apel döyüşləri barədə söhbətləşirik. Məlum olur ki, döyüşlər zamanı Füzuli, Beyləqan və Xocavənddən olan keçmiş döyüşçülər səngərlərə gediblər. Komandirlər keçmiş döyüşçülərin döyüşməsinə ehtiyac olmadığını bildirsələr də, veteranlar arxada əsgərlərin görməli olduğu işləri görüblər. Döyüşlər zamanı keçmiş döyüşçülər əsgərlərimizlə çiyin-çiyinə olublar.

Saat 6-da bayram tədbiri başlayır. Bayram tədbiri Xocavənd rayon İcra Hakimiyyətinin başçısı Eyvaz Hüseynov, ikinci ordu komandanı General mayor Mais Bərxudarov, Füzuli rayon İcra Hakimiyyətinin başçısı Alı Alıyev, yüksək rütbəli zabitlər və keçmiş döyüşçülər tərəfindən Xocavənd rayon İcra Hakimiyyətinin qarşısındakı Heydər Əliyevin heykəlinin önünə qərənfillərin düzülməsi ilə başlayır.

Bayram tədbirinə çoxlu sayda əsgər, zabit, çavuş və gizirlərlə yanaşı rayon sakinləri də gəlib. Rayon sakinlərindən əlavə Füzuli, Beyləqan, Ağcabədi, Saatlıdan keçmiş döyüşçülər də bayram tədbirinə qatılıb. Yüzlərlə insan mülki və hərbçilər bir yerdə bayram edir.

Bundan sonra əməkdar incəsənət xadimi, Müdafiə Nazirliyinin Mənəvi-Psixoloji Hazırlıq və İctimaiyyətlə Əlaqələr İdarəsi rəisinin müavini, polkovnik Abdulla Qurbani bayram tədbirini açıq elan edir. Abdulla Qurbani aprel döyüşlərinin xalqımıza verdiyi ruhdan danışır. Bundan sonra Abdulla Qurbani sözü Xocavənd rayon İcra Hakimiyyətinin başçısı Eyvaz Hüseynova verir.

Eyvaz Hüseynov bildirir ki, biz aprel döyüşlərindən bir qədər əvvəl Xocavənddə "Qarabağa yaz gələcək" adlı tədbir keçirdik. Həmin görüşdə Mais Bərxudarov da iştirak edirdi. O zaman komandirimiz polkovnik idi. Orada bildirdim ki, Qarabağa yaz ali baş komandirin əmrilə əsgərlərimizin düşməni əzib Qarabağı işğaldan azad etməsindən sonra gələcək. Az sonra döyüşlər başladı. Qarabağa yaz gəldi. Polkovnik Mais Bərxudarov da General-mayor rütbəsi aldı. Bu gün Silahlı Qüvvələr günü ilə yanaşı, həm də aprel döyüşlərində əldə etdiyimiz qələbəni qeyd edirik.

Eyvaz Hüseynov: "Azərbaycan ordusu 1918-ci ildə çox ağır şəraitdə yaranıb. Respublikamızın bütün ərazisi işğal altında idi. Bu işğaldan azad olmaq üçün 1918-ci ildə məhz bu gün Azərbaycan ordusu yarandı. Azərbaycan ordusu çox ağır, şərəfli yol keçib. 1991-ci ildə ordumuz eynilə 1918-ci ildəki kimi ağır şəraitdə formalaşmağa başladı. Ordu yaratmaq çox çətin prosesdir. Ordumuz dinc vaxtda yox, döyüşlər gedə-gedə yaradılırdı. Təbii ki, bu çox çətin proses idi. Qardaşlarımızın döyüşməsinə baxmayaraq torpaqlarımızın 20%-i düşmən tərəfindən işğal edildi. Bunun çoxlu səbəbləri var. Əsas səbəb uzun illər torpaqlarımızı ələ keçirməyə hazırlaşan bir düşmənlə üz-üzə idik. Həmin dövrdə döyüşən qüvvələr, qardaşlar var idi. Ordu nizami deyildi. Təsəvvür edək, 1991-ci ildən 1993-cü ilə kimi Azərbaycan 9 müdafiə naziri dəyişmişdi. Bununla torpaq müdafiə etmək olmazdı. 20 ildən çox idi ki, məğlubiyyət, utanc hissi ilə yaşayırdıq. Ermənilər özləri haqda mif yaratmışdılar. Guya, onların müdafiə xətti keçilməzdir, orduları məğlubedilməzdir. Bizim qürurumuz zədələnmişdi. Aprel ayındakı döyüşlər ordumuzun gücünü göstərdi. Bizim zədələnmiş qürurumuz bərpa edildi. İnanırıq ki, yaxın zamanda qələbəni görəcəyik. Qarabağlı günlərdə görüşənədək".

Eyvaz Hüseynovun çıxışından sonra 26 iyun Silahlı Qüvvələr günü münasibəti ilə hərbçilər, keçmiş döyüşçülər, şəhid ailələri və əsgərlər fəxri fərman və qiymətli hədiyyələrlə mükafatlandırılır.

Birgə cəbhə xəttinə yola düşdüyümüz birinci Qarabağ müharibəsi döyüşçüləri, ehtiyatda olan zabitlər polkovnik-leytenant Abuzər Əbilov və kapitan Tərlan Eyvazov da mükafatlandırılanlar sırasında yer alır.

Hərbçi olması ilə yanaşı, həm də rəssam olan Tərlan Eyvazov bayrama əli boş gəlmədiyini bildirərək, çəkdiyi portretlərdən birini Eyvaz Hüseynova tədim edir.

Mükafatlandırma mərasimindən sonra söz Füzuli rayon İcra Hakimiyyətinin başçısı Alı Alıyevə verilir. Alı Aliyev də əsas diqqəti aprel döyüşlərinə ayırır.

Bundan sonra bayram tədbirinin bədii hissəsi başlayır. Bakıdan cəbhə bölgəsinə gələn müğənnilər əsgərlər və rayon sakinlərinə konsert verir.

Bu arada, bir neçə gün sonra təxris olan əsgərlərimizlə söhbət edirik. Onlar Lələ təpənin alınmasında döyüşüblər. Əsgər Həsənov deyir, bir yandan sevinirik ki, hərbi xidmətimizi başa vururuq və üstəgəl döyüşüb az da olsaq torpaq almışıq. Kədər də var ki, biz hazır döyüş görmüşdük, müharibə olmadı, torpaqlarımızın tamamilə işğaldan azad edilməsini görmədik. Ancaq müharibə olsa, mütləq geri qayıdacam. Şəhid yoldaşlarımızın qanını alacam.

Bayram tədbirinin sonunda General-mayor Mais Bərxudarov, Eyvaz Hüseynov və Alı Alıyev rayon sakinlərinə və əsgərlərimizə təşəkkür edirlər.

Tədbirdən çıxıb keçmiş döyüşülərin yanına gəlirik. Onlar isə yenə öz aləmlərindədirlər. Keçmiş döyüşlərdən danışırlar. Filankəs vaxtında çatdırsa idi, filan ərazilərimiz getməzdi. Keçmiş döyüşçü, ehtiyatda olan polkovnik-leytenant Abuzər Əbilov deyir ki, bunlar düzələn deyil, söhbətləri ancaq budur. Müharibə başlayıb, torpaqlarımızı geri alsaydıq, keçmiş döyüşçülərə təzə mövzu çıxardı...

İnsanlarda o ruhu görəndə anlayırıq ki, işğal altındakı torpaqlar geri qayıdacaq. Hərbçi və mülki fərq etmir, hər kəs torpaqların sülh yolu ilə qaytarılmasını özünə ayıb bilir. O torpaqları müharibə yolu ilə qaytarmaq istəyirlər...

Qarabağlı günlər ümidi ilə...

Səxavət Məmməd
Ölkə.Az

Partner Xəbər