Səfir sabiq naziri oğurluqda ittiham etdi
“Ölkə.Az” xəbər verir ki, bu barədə səfir Vilayət Quliyev öz "Facebook" səhifəsində yazıb.
“Deyəsən son illərdə əli maddi çax-çuxdan çıxan keçmiş həmkarım, əski ulaşdırma bakanımız Nadir müəllim Əhmədov ixtiyar yaşında intellektual çapovulçuluğa girişib. Mənim 2008-ci ildə "525-ci qəzetdə" çap olunan "Türk ordusunun azərbaycanlı generalları" adlı məqaləmi sərlövhəsini və bir sözünü də dəyişmədən əvvəlcə 2009-cu ildə "Elm və Təhsil" nəşriyyatında çıxan "İblis xislətli erməni" kitabına, sonra da özünün www.nadir-ahmedov.com saytına yerləşdirib. İndi google-da axtarış verəndə bir sətrini də yazmadığı uzun zəhmət və axtarışların bəhrəsi olan bu araşdırma-yazı Nadir müəllimin "əsəri" kimi təqdim olunur.
Məqalədə haqqında danışılan general-polkovnik Mehmet Nuri və ordu generalı Mahmud Berköz (Sarıkərimli) qardaşları əslən şəkili olduqları üçün yəqin Nadir müəllim elə hesab edir ki, bu mövzudan yazmaq başqa bölgədən olan bir kimsənin işi deyil, yalnız onun şəninə şayandır. Amma yeni peyda olmuş "qocaman ədib" heç olmazsa köhnə şəkili kimi vətəninin övladlarından söz açan yazıya bir-iki məhəlli ştrix əlavə etsəydi, yenə də dərd yarı idi...”.
Diplomat eyni zamanda Ülviyyə Tahirqızını onun məqaləsini oğrulamaqda ittiham edib: “Görünür, "Oğrudan oğruya halaldır" prinsipi ilə hərəkət edən Ülviyyə Tahir qızı adlı bir xanım da eyni yazını başlığını da dəyişmədən "Xalq cəbhəsi qəzeti"ndə öz araşdırması kimi çap etdirib (bax. "Türk ordusunun azərbaycanlı generalları", "Xalq cəbhəsi qəzeti", 25 aprel 2014-cü il, www.xalqcebhesi.az.news.accident)
Əcəb işdir! Adam bilmir qocasından rəncidə olsun, yoxsa cavanından incisin! Yəqin ki, ən salamat yolu oxucu sayını artırdıqlarına görə bu "müəlliflərə" təşəkkür etməkdir”.
Qeyd edək ki, Vilayət Quliyev 1999-2004-cü illərdə Azərbaycanın Xarici işlər naziri olub.
Yazıda adı çəkilən Nadir əhmədov 1985-ci ildən 1997-ci ilədək Rabitə nazirinin müavini və 1997-ci ildən 2004-cü ilədək isə Rabitə naziri vəzifəsində işləyib.
Mürtəza
Ölkə.Az
