Tarkan 45 illik həyatından film çəkir

 “Ölkə.Az” xəbər verir ki, film meqastarın yaşadığı ölüm təhlükələri, problemlər, şöhrət zirvəsinə qalxdığı yoldan bəhs edəcək.

Tarkanın anası Nəşə Təvətoğlu əri Əli Təvətoğlu ilə evləndikdən sonra çətin günlər keçirib. Qadın Tarkana hamilə qaldığını öyrənəndə uşağı tələf etmək istəyib. Amma yuxusunda oğlunun ailəsi və ölkəsi üçün çox xeyirli bir övlad olacağını görüb və bundan vaz keçib.

Tarkanın adı da anasının yuxusuna görə verilib. Uşaq yaşlarında o, böyük qardaşı ilə at arabasının ardınca qaçaraq dəhşətli qəzaya düşüb. Həkimlər “bu uşaq yaşamayacaq” desələr də, Tarkan sağ qalıb. Meqastar böyüdüyü Almaniyada da irqçilərin hücumuna məruz qalıb. 15 yaşı olanda atasının xəstəliyinə görə Türkiyəyə köçüblər.

1990-cı illərdə ulduzu parıldamağa başlayan meqastar Fransada avtomobil qəzasına düşür və ölümlə üz-üzə gəlir. Uzun müddət reanimasiyada yatan Tarkan sağalır.

Həyatı keşməkeşli olan Tarkanın filmdə rol alıb-almayacağı hələ bilinmir.

Hikmət Həsənov
Ölkə.Az