Yerin nəhəng göy cismi ilə toqquşacağı xəbərinə Şamaxı Rəsədxanasından maraqlı açıqlama
Yür kürəsinin nəhəng göy cismi ilə toqquşma təhlükəsi var.
“Ölkə.Az” xəbər verir ki, amerikalı mütəxəssislərin iddiasına görə, oktyabrın 12-də Yerdə təbii fəlakətlər baş verə bilər. Çünki həmin tarixdə “2012-TS4” adlı asteroid Yerə yaxın məsafədən keçəcək. İddiaya görə, əgər asteroid Yerə çırpılarsa, böyük fəlakət baş verə bilər. Bu da dünyanın sonu deməkdir.
Qeyd edək ki, “2012-TS4” adlı asteroid 2012-ci il, oktyabrın 4-də tapılıb. Hələlik həmin asteroidin orbitini tam öyrənmək mümkün olmayıb. Tam öyrənilmədiyinə görə, ehtimal edirlər ki, həmin asteroid Yerlə toqquşa bilər.
Azərbaycanlı mütəxəssislər isə deyilənlərə birmənalı yanaşmayıblar. AMEA Şamaxı Astrofizika Rəsədxanasının elmi işlər üzrə direktor müavini Xıdır Mikayılov “Ölkə.Az”a açıqlamasında bildirdi ki, həqiqətən də, oktyabrın 12-də nəhəng bir asteroid Yerə ən yaxın məsafədən keçəcək. Onun sözlərinə görə, bu hadisə oktyabrın 12-də səhər saatlarında baş verəcək.
“Bu hadisə oktyabrın 12-də səhər saat 9 radələrində baş verəcək. “2012-TS4” adlı asteroid Yerə yaxın məsafədən keçəcək. İlkin araşdırmaların nəticələri göstərir ki, həmin asteroidin Yerlə toqquşma ehtimalı milyonda birdir. İlkin hesablamalara görə, o, Yerdən 43-45 min kilometr uzaqlıqdan keçəcək. Düzdür, həmin asteroid Ayın orbitini kəsib keçəcək. Əgər həmin asteroid Yerlə toqquşsa, böyük təhlükələr yarada bilər. Dağıntılar baş verər. Təxmini hesablamalar göstərir ki, 2050-ci ilə qədər belə cisimlərin Yerlə toqquşma ehtimalı milyonda birdir. Yəni belə nəhəng asteroidlərin milyonda biri Yerə düşə bilər. Ehtimal çox azdır. Həmin saatlarda Yerlə toqquşmasa, demək bütün təhlükələr sovuşub. Toqquşma baş verərsə, Yerdə hansı ərazilərdə dağıntıların olacağını demək çox çətindir. Bunu hesablamaq olduqca çətindir”, - deyə X.Mikayılov bildirib.
Məsələ ilə əlaqədar astroloq Səbuhi Rəhimli “Ölkə.Az”a açıqlamasında bildirib ki, deyilənlərin hamısı cəfəngiyyatdır. Onun sözlərinə görə, əgər həqiqətən də, elə bir təhlükə olarsa, insanlara xəbərdarlıq edilərdi.
“Təxminən 2003-cü ildən bu günə qədər planetimizdə insanlara ziyan vuran siyasi-iqtisadi proseslər başlamaqdadır. Dünyanın siyasi dəllalları medianı ələ alıb, çox vaxt gərginlik yaradan informasiyalar yayırlar. 2012-ci il 21 dekabr tarixində dünyanın sonu barədə xəbərlər verilmişdi. Hətta bu barədə film də çəkilmişdi. Sonda isə yayılan xəbərlərin heç bir əsası olmadığı bilindi. İnsanlar elmsizdir, maariflənmə prosesi ləng inkişaf etdiyinə görə, belə xəbərlərə tez reaksiya verirlər və inanırlar. Sonra dedilər ki, 2015-ci ilin noyabr ayında 8 gün qaranlıq olacaq. İbtidai astronom savadı olan insan bilir ki, ən böyük planet Yerə ən yaxın məsafədən keçsə belə, uzağı 7-8 saat əlavə qaranlıq olar. Həmin vaxt da, gecəyə təsadüf etməsə. Bütün bunlar cəfəngiyyatdır. Əgər həqiqətən də, elə bir təhlükə olarsa, insanlara xəbərdarlıq edilər. Gizlənmək üçün insanlara göstərişlər verilər. Varlı insanlar hardasa gizlənərdilər. İnsanları təşvişdə saxlayırlar. Çünki belə məsələlər barədə düşünən cəmiyyət siyasi-iqtisadi proseslərdən uzaq qalır. 21 dekabr məsələsinə görə dünyada bir çox insan banklardan külli miqdarda kreditlər götürdü ki, onsuzda dünyanın sonu olacaq, pulları qaytarmayacaqlar. Onlar bu günə qədər həmin kreditləri ödəməklə məşğuldurlar”, - deyə S.Rəhimli qeyd edib.
Ziya Səccad
Ölkə.Az
