Şagirdin məktəbdə \"patı\" satması xəbəri ilə bağlı DİN-dən açıqlama

Bakıda şagirdlərin sinifdə qeyri-etik davranışlarını əks etdirən videogörüntü ilə bağlı araşdırma yekunlaşıb.

Şagirdlərin sinif otağında tədris prosesinə uyğun olmayan davranışının əks olunduğu videogörüntü ilə bağlı məktəb rəhbərliyi tərəfindən araşdırma aparılıb, dərsin təşkilində yol verdiyi nöqsanlara görə fənn müəlliminə töhmət verilib. 

165 nömrəli tam orta məktəbdən verilmiş məlumatda qeyd olunur ki, məktəbin direktor müavinləri ilə bağlı tənbeh tədbirləri görülməsi üçün isə təqdimat verilib.

Ölkə.Az xəbər verir ki, həmçinin hüquq-mühafizə orqanlarının əməkdaşları tərəfindən valideyn və şagirdlərin izahatları alınıb. Üzrxahlıq edən şagirdlər bir daha belə hallara yol verməyəcəklərini bildiriblər. Şagirdlər müvafiq qaydada profilaktik tədbirlər görülməsi üçün qeydiyyata götürülüb.

Məsələ ilə bağlı məktəbin təlim-tərbiyə işləri üzrə direktor müavini Validə Ağalarova faktı təsdiqləyərək bildirib ki, həmin görüntülərdə olan şagirdlə bağlı əvvəllər də dəfələrlə polis idarəsinə müraciət edilib.

“Bu uşaq polislərin nəzarətində olan, çətin tərbiyə olunan uşaqdır. Həmin şagird bir müəllim yox, digər müəllimlərin də başına oyun açıb. Bu uşaq məktəbə siqaret gətirib, uşaqlara paylayır. Hətta narkotik maddə olan  “patı” gətirib satdığı deyilir. Biz bu barədə dəfələrlə müvafiq orqanlara məlumat vermişik. Hətta sənədləşdirib, onu  Qubada çətin tərbiyə olunan uşaqların oxuduğu məktəbə göndərmək istəyirdik. Pandemiya dövrünə düşdüyündən bu iş yarımçıq qaldı", - o qeyd edib.

Direktor müavininin şagirdi haqqında səsləndirdiyi ifadələrlə əlaqədar DİN-nin əməkdaşı Anar Qafarovla əlaqə saxladıq. O, öz növbəsində "Ölkə.Az"a açıqlamasında bildirib ki, indiyədək məktəblərdə narkotik vasitələrin satışı ilə bağlı fakt aşkarlanmayıb. 

"Bununla bağlı hansısa bir məktəb və ya müəllimlər tərəfindən fakt aşkarlanarsa, dərhal ərazi üzrə polis bölməsinə və ya DİN-nin qaynar xəttinə məlumat vermələri xahiş olunur", - qurum rəsmisi bildirib.

Natiq
Ölkə.Az