Moskva seçim qarşısında: Rusiya üçün öldürücü zərbə...

Qərbin Rusiyanın təhlükəsizliyin təminatı ilə bağlı tələblərinə cavab verməsi, Moskvanı dilemma qarşısında qoyub. Bu vəziyyətdə Moskvanın isə iki seçimi var; ya sülh, ya da müharibə... Dilemma qarşısında qalan durum isə Kremli “Moskva göz yaşlarına inanmır” ifadəsini xatırladır.

Moskva problemin sülh yolu ilə həlli istiqamətində aparacağı dialoqun perspektivinə və ciddi nəticə əldə edəcəyinə inanmır. Müharibə variantının isə indiki halda hansı fəlakətlərə gətirəcəyini və nəticənin necə olacağını hesablaya bilmədiyindən problemin güc yolu ilə həllindən qaçır. Bilir ki, güc yoluna əl atacağı təqdirdə, təkcə Qərbin deyil, birmənalı şəkildə beynəlxalq aləmin  ciddi qınağına tuş gələcək. Ona görə də çıxılmazlıq durumuna düşən Moskva iki gündür ki, hər vasitə ilə  müharibəyə başlamayacağını və bunun əleyhinə olduğu barədə bəyanatlar verməkdədir. 

Amma Qərb Kremlin bu bəyanatlarına inanmır. ABŞ prezidenti Co Bayden Ukrayna prezidenti Volodimir Zelenski ilə son telefon danışığında da  Rusiyanın Ukraynaya  hücum edəcəyi barədə xəbərdarlıq edib və hətta tarix verərək fevralda hücum edəcəyini deyib. Baydenin bu xəbərdarlığı onu deməyə əsas verir ki, artıq Qərb Rusiyanın Ukraynaya hücum etməyəcəyi barədə verdiyi bəyanatların səmimiyyətinə inanmır. Çünki Qərb Rusiyanın belə bəyanatlarının acı nəticəsinin 2008-ci ildə Gürcüstanda, 2014-cü ildə Krım, Donbas hadisəsində şahidi olub. Ona görə də Qərb Rusiyanın verdiyi bəyanatlara baxmayaraq ehtiyatı əldən vermək istəmir.

Digər bir tərəfdən Qərb Rusiyanın hansısa formada təxribat törədərək Ukraynaya hücum etməyəcəyinə əmin deyil. Yəni Rusiya birbaşa deyil, dolayı vasitələrdən, və ya digərlərindən burada vasitə kimi istifadə edib, təxribat törədib hərbi əməliyyatlara başalaya bilər. Bu istisna edilmir.

Odur ki Qərb Moskvanı geriyə otuzdurmaq üçün təzyiq diplomatiyasını davam etdirməklə dünyanın digər güclərini də bu prosesə cəlb etmək istəyir. Ən maraqlı cəhət isə ondan ibarətdir ki, Ağ Ev Rusiyaya təsir etmək üçün Çin faktorundan faydalanmağa çalışır. ABŞ dövlət katibinin Avropa və Avrasiya məsələləri  üzrə köməkçisi Viktoriya Nuland Çindən Rusiyanı çəkindirici vasitə kimi istifadə edəcəyini bəyan edib. 

“Biz Pekini Moskva üzərində təsirindən istifadə etməyə və diplomatiyanı təşviq etməyə çağırırıq, çünki Ukraynada münaqişə Çin üçün də yaxşı olmayacaq”, - Nuland bəyan edib.

Qərb təzyiq vasitəsi kimi Moskvanı  daha sərt sanksiyalarla hədələyir. Xüsusən də SWIFT sanksiyası ilə... Qərbin Moskvaya sanksiyaları sərtləşdirməsi, artıq Putin hakimiyyətini və onun ətrafını ciddi narahat edir. Bu sanksiyalar yaxşı heç nə vəd etmir. Digər tərəfdən Kremlin Qərbin bu sərt mövqeyindən sonra da geri çəkilməyəcəyini bəyan etməsi, Rusiyanı daha çıxılmaz dalana sürükləyir. Və bu Kremlə yaxşı heç nə vəd etmir. Əksinə, Rusiyanın siyasi elitasında və oliqarxiyasında ciddi narazılıqlara, hakimiyyət daxilində çatlara səbəb olur. Əgər Qərb SWIFT sanksiyasını tətbiq edərsə, bu, Rusiya üçün öldürücü bir zərbə olmaqla yanaşı və bir silah atmadan ölkəni çökdürmək deməkdir. Belə bir sanksiya Rusiyaya tətbiq edilərsə, o zaman ilk növbədə siyasi elita və oliqarxiya Putinə qarşı çıxacaq. 

Odur ki dilemma qarşısında qalan Moskvanın atdığı adekvat addımlar uğurlu nəticələr vəd etmir. Nəticədə Moskva yeni geosiyasi situasiyada öz əvvəlki statusu da sual altına düşə bilər. Ona görə ki, Moskvanın  boğulanın “saman çöp”lərindən yapışması, lazımi effekti verməyəcək.  Bax, o zaman “Moskva göz yaşlarına inanmır” ifadəsi real ola bilər.

Mürtəza Bünyadlı
Ölkə.Az