Öz oyunlarının qurbanına çevrilənlər - Bakının geosiyasi zəfəri
“Azərbaycanın güclənməsi, regionun əsas siyasi, iqtisadi və geostrateji mərkəzlərindən birinə çevrilməsi bəzi dairələri ciddi şəkildə narahat edir. Xüsusilə də uzun illər ərzində Cənubi Qafqazı öz geosiyasi oyun meydanına çevirməyə çalışan qüvvələr bu gün yeni reallıqlarla barışmaq istəmirlər. Onların əsas hədəfi isə yenə də Azərbaycandır.
İnsan Hüquqları üzrə Avropa Məhkəməsinin son qərarı ətrafında yaranan müzakirələr göstərir ki, bəzi Qərb institutları hələ də hüququn deyil, siyasi sifarişlərin təsiri altında fəaliyyət göstərirlər. Azərbaycanın ərazi bütövlüyü və dövlət suverenliyi ilə bağlı məsələlərdə nümayiş etdirilən ikili standartlar artıq təsadüf deyil, sistemli siyasətin tərkib hissəsidir”.
Bunu Ölkə.az-a açıqlamasında Milli Məclisin deputatı Cavanşir Feyziyev deyib.
Onun sözlərinə görə, ən böyük paradoks isə ondan ibarətdir ki, vaxtilə Ermənistanın Azərbaycan torpaqlarını işğal etdiyini qəbul edən və bunu öz qərarlarında təsdiqləyən dairələr bu gün həmin faktları görməzdən gəlməyə çalışırlar. “İşğalın nəticəsində yüz minlərlə insanın hüquqlarının tapdalanmasına susanlar indi saxta ittihamlar və qondarma arqumentlər üzərindən Azərbaycana təzyiq göstərməyə çalışırlar”, - o vurğulayıb.
Deputat əlavə edib ki, lakin onlar bir həqiqəti unudurlar:
“Azərbaycan artıq 1990-cı illərin zəif və müdafiəsiz dövləti deyil. Azərbaycan öz ərazi bütövlüyünü döyüş meydanında bərpa etmiş, siyasi müstəvidə mövqelərini möhkəmləndirmiş, iqtisadi gücünü artırmış və beynəlxalq münasibətlər sistemində söz sahibi olan dövlətə çevrilib. Məhz buna görə də anti-Azərbaycan dairələrinin növbəti hücumları da əvvəlkilər kimi nəticəsiz qalacaq.
Xüsusilə Fransa son illərdə Azərbaycana qarşı aparılan kampaniyaların əsas mərkəzlərindən birinə çevrilib. Özünü demokratiyanın və insan hüquqlarının müdafiəçisi kimi təqdim etməyə çalışan Paris əslində erməni lobbi qruplarının təsiri altında regionda sülhə deyil, qarşıdurmaya xidmət edən siyasət yürüdür.
Fransa parlamentində qəbul edilən qərəzli qətnamələr, beynəlxalq təşkilatlarda aparılan anti-Azərbaycan kampaniyaları, ermənipərəst media şəbəkələrinin koordinasiyalı fəaliyyəti, Ermənistana silah göndərilməsi və regionda hərbi balansı pozmağa yönəlmiş addımlar bunun açıq göstəricisidir. Əslində isə bu siyasət nə Azərbaycana zərər vurur, nə də regiondakı reallıqları dəyişir. Əksinə, hər uğursuz həmlə Fransanın öz nüfuzuna zərbə vurur”.
Deputat onu da qeyd edib ki, bu gün dünya dəyişir: “Yeni güc mərkəzləri formalaşır. Enerji marşrutları, nəqliyyat dəhlizləri və geoiqtisadi əlaqələr yenidən qurulur. Bu proseslərin mərkəzində isə Azərbaycan dayanır.
Bakı artıq təkcə Cənubi Qafqazın deyil, Avrasiyanın böyük hissəsini birləşdirən strateji əməkdaşlıq platformasının əsas sütunlarından biridir. Avropanı Mərkəzi Asiya, Yaxın Şərq və Çinlə birləşdirən mühüm layihələrin mərkəzində məhz Azərbaycan dayanır. Bəzi dairələrin narahatlığı da məhz buradan qaynaqlanır. Onlar Azərbaycanın müstəqil siyasətindən, artan nüfuzundan, güclənən iqtisadi potensialından və regionun gələcəyini müəyyənləşdirən əsas aktora çevrilməsindən narahatdırlar. Buna görə də hüquq adı altında siyasət, insan hüquqları adı altında təzyiq, demokratiya adı altında isə ikili standartlar tətbiq etməyə çalışırlar. Lakin son otuz ilin təcrübəsi bir həqiqəti sübut edib: Azərbaycanı təzyiqlə, hədə-qorxu ilə, informasiya müharibəsi ilə və ya siyasi manipulyasiyalarla yolundan döndərmək mümkün deyil.
Bu dövlət ən ağır sınaqlardan keçib, işğalla üzləşib, təcrid cəhdlərini dəf edib, qlobal təzyiqlərə müqavimət göstərib və bütün bunlardan daha güclü çıxıb.
Bu gün də nəticə fərqli olmayacaq.
Fransadakı anti-Azərbaycan dairələri, erməni lobbisinin sifarişlərini yerinə yetirən siyasi qruplar və müxtəlif beynəlxalq platformalarda ölkəmizə qarşı kampaniyalar aparan qüvvələr növbəti dəfə məğlubiyyətlə üzləşəcəklər. Çünki onların arqumentləri yalan üzərində qurulub.
Azərbaycanın mövqeyi isə beynəlxalq hüquqa, tarixi həqiqətlərə və regionda yaranmış yeni geosiyasi reallıqlara söykənir. Tarix göstərib ki, həqiqət gec-tez öz yerini tutur. Azərbaycan isə bu həqiqətin, ədalətin və qələbənin tərəfindədir”.
Mürtəza
