Qərəzdən geosiyasi məğlubiyyətə: Bakının qarşısında aciz qalanlar
“Son günlər İnsan Hüquqları üzrə Avropa Məhkəməsinin “V.T. və digərləri Azərbaycana qarşı” işi üzrə qəbul etdiyi qərar ətrafında yaranan müzakirələr bir daha göstərdi ki, bəzi Qərb dairələri Azərbaycana münasibətdə hələ də obyektivlik və beynəlxalq hüquq prinsiplərindən uzaq yanaşma nümayiş etdirirlər. Xüsusilə də Azərbaycanın dövlət suverenliyi və ərazi bütövlüyü ilə bağlı məsələlərdə müşahidə olunan ikili standartlar təsadüfi deyil, uzun illərdir davam edən siyasi təzyiq siyasətinin tərkib hissəsidir”.
Bunu Ölkə.az-a açıqlamasında deputat Arzuxan Əlizadə deyib.
O bildirib ki, Azərbaycan müstəqilliyini bərpa etdiyi gündən etibarən müxtəlif formalarda siyasi, hibrid, informasiya və diplomatik savaşlarla üzləşib: “Bu təzyiqlərin əsas məqsədi ölkəmizin müstəqil siyasət yürütmək imkanlarını məhdudlaşdırmaq, beynəlxalq nüfuzunu zəiflətmək və regiondakı rolunu kölgə altına almaq olub. Lakin bütün bu cəhdlər hər dəfə uğursuzluğa düçar olub. Bunun əsas səbəbi Prezident İlham Əliyevin həyata keçirdiyi uzaqgörən, prinsipial və milli maraqlara əsaslanan siyasətdir.
Avropa Məhkəməsinin son qərarı da məhz bu kontekstdə qiymətləndirilməlidir. Qərarda Azərbaycanın ərazi bütövlüyü və suverenliyi ilə ziddiyyət təşkil edən terminologiyadan istifadə olunması, vaxtilə Ermənistanın Azərbaycan torpaqlarını işğal etdiyini tanıyan hüquqi mövqelərlə uyğun gəlməyən yanaşmaların nümayiş etdirilməsi ciddi suallar doğurur. Bu, təkcə hüquqi müstəvidə deyil, həm də siyasi baxımdan qərəzli münasibətin göstəricisi kimi qəbul edilir.
Məsələnin digər tərəfi isə Fransanın son illərdə Azərbaycana qarşı həyata keçirdiyi sistemli fəaliyyətlərdir. İkinci Qarabağ müharibəsindən sonra rəsmi Paris regionda sülh və əməkdaşlığın təşviqinə töhfə vermək əvəzinə, əksər hallarda gərginliyin dərinləşməsinə xidmət edən mövqe nümayiş etdirib. Fransa parlamentində qəbul edilən qərəzli qətnamələr, müxtəlif beynəlxalq təşkilatlarda Azərbaycana qarşı aparılan kampaniyalar, erməni lobbi dairələrinin təsiri altında formalaşan siyasi qərarlar bunun bariz nümunəsidir”.
Deputat əlavə edib ki, Fransanın bəzi siyasi dairələri regionda yaranmış yeni reallıqları qəbul etmək istəmirlər: “Onlar hələ də Cənubi Qafqazı köhnə geosiyasi stereotiplərlə qiymətləndirməyə çalışırlar. Halbuki bölgədə artıq tamamilə yeni siyasi və iqtisadi əməkdaşlıq mühiti formalaşır. Azərbaycan bu proseslərin əsas təşəbbüskarlarından biridir.
Bu gün Bakı yalnız Cənubi Qafqazın deyil, daha geniş Avrasiya məkanının mühüm siyasi və iqtisadi mərkəzlərindən birinə çevrilib. Azərbaycanın təşəbbüsü ilə həyata keçirilən enerji, nəqliyyat və logistika layihələri Avropanı, Cənubi Qafqazı, Mərkəzi Asiyanı, Yaxın Şərqi və Çin istiqamətini birləşdirən strateji əməkdaşlıq platformaları yaradır. Bu layihələr təkcə iqtisadi fayda gətirmir, həm də qlobal təhlükəsizliyin, sabitliyin və qarşılıqlı etimadın möhkəmlənməsinə xidmət edir.
Məhz buna görə də Azərbaycana qarşı aparılan informasiya və hibrid müharibə kampaniyaları nəticə vermir. Çünki reallıqlar tamamilə fərqlidir. Ölkəmiz beynəlxalq münasibətlər sistemində etibarlı tərəfdaş kimi tanınır, enerji təhlükəsizliyinə mühüm töhfələr verir, müxtəlif sivilizasiyalar və regionlar arasında körpü rolunu oynayır.
Fransa və bəzi anti-Azərbaycan dairələri anlamalıdırlar ki, siyasi qərəz, dezinformasiya və təzyiq siyasəti ilə Azərbaycanın əldə etdiyi uğurları dayandırmaq mümkün deyil. Son illərin təcrübəsi göstərir ki, bu cəhdlərin hər biri iflasa uğrayıb və bundan sonra da eyni aqibətlə üzləşəcək. Çünki həqiqətlər dəyişmir, regional reallıqlar dəyişmir və Azərbaycanın müstəqil dövlət olaraq öz milli maraqlarını qətiyyətlə müdafiə etmək iradəsi dəyişmir.
Nəticə etibarilə, bu cür qərarlar və kampaniyalar Azərbaycana deyil, onların müəlliflərinə zərbə vurur. Çünki beynəlxalq hüququn selektiv tətbiqi, ikili standartlar və siyasi sifarişlər üzərində qurulan yanaşmalar ilk növbədə həmin institutların nüfuzuna xələl gətirir. Azərbaycan isə öz strateji xətti ilə irəliləməyə, regionda sülhün, əməkdaşlığın və inkişafın əsas təminatçılarından biri olmağa davam edir. Tarix dəfələrlə sübut edib ki, qərəzli kampaniyalar keçicidir, dövlət maraqlarına söykənən prinsipial siyasət isə qalıcıdır”.
Mürtəza
