KQB-nin "sülhməramlı missiya"sı

Bu ayın son on gününün ən yadda qalan, ən həyəcanverici hissəsi, ildırım sürəti ilə baş verən hadisələr, cəbhə xəttində vəziyyətin gərginləşərək az qala müharibə həddinə çatması, Kremlin, ATƏT və ABŞ-ın bu hadisələrə reaksiyası, bir də Putinin təşkil etdiyi Azərbaycan və Ermənistan prezidentlərinin Soçi görüşü oldu.

Azərbaycan əsgərlərinin erməni diversantlar tərəfindən öldürülməsindən sonra başlayan cavab əməliyyatı qısa bir müddətdə ermənilərə qüvvələr nisbətinin kimin tərəfində olduğunu başa saldı. Cəbhənin müxtəlif istiqamətlərində ermənilərə ağır zərbələr endirən ordumuz bütün Ermənistanı silkələdi və başda Sarkisyanla erməni katalikosu olmaqla erməni rəsmilərini dünya ictimaiyyətinə müraciət edərək Azərbaycan ordusunu dayandırmağa çağırmağa vadar etdi. Bir gecəlik əməliyyatda məhv edilmiş 100-ə yaxın terrorçusu Ermənistan rəhbərliyinə Azərbaycanın gücünü bir daha göstərdi.

İlk reaksiya ATƏT-dən gəldi. Əməliyyatların davam etdiyi əraziyə axışan missiya nümayəndələri cəbhə bölgəsindəki hərbi birləşmələrimizdə yoxlama aparan müdafiə naziri Zakir Həsənovun kortejindən əl çəkmədilər. ATƏT rəhbərliyinin təkidli xahişləri Azərbaycan prezidentinə çatdırıldı. ABŞ isə Bakıdakı səfirinin dili ilə Azərbaycandan əks-zərbələrin dayandırılmasını istədi. Xankəndi morqunu dolduran erməni əsgərlərinin cəsədi İrəvanı Kremlə müraciət etməyə məcbur etdi. Hadisələri nəzarətdə saxlayan, Qarabağ probleminin ideya müəllifi olan Rusiya dərhal hərəkətə keçdi. Necə olmasa da Qafqazdakı satrapını əzirdilər, daha doğrusu quduz dişlərini itilləyib onun-bunun üstünə saldığı köpəyini kötəkləyib layiq olduğu yeri göstərirdilər. İrəvanın vay-şivənindən sonra Putin İlham Əliyevlə Serj Sarkisyanı Soçidə danışıqlar aparmağa çağırdı. 

Azərbaycan və Ermənistan prezidentləri ayın doqquzunda Rusiyanın bu kurort  şəhərində bir daha görüşdülər. Xalqımızın qanı ilə suvarılmış torpaqlarımızı azad etməyə bir daha imkan verilmədi. Məsələnin heyrətamiz tərəfi isə ondan ibarət idi ki, Qarabağ konfliktini yaradan, bu münaqişəni donduran, müharibə təhlükəsini regionun başı üstündən əskik etməyən Rusiya, tərəfləri müdrik olmağa və səbr etməyə çağırdı. 

Bütün Qafqaz xalqlarının bədbəxtliklərinin başında duran Rusiya tutduğu son mövqeyi ilə yenə də var olduğu müddətcə xırda xalqaların bədbəxtlikləri üzərində öz imperiyasını möhkəmlədəcəyini və Çarlıq siyasətinə sadiq qalacağını bir daha sübut etdi. SSRİ-nin dağılmasından sonra başda Qarabağ problemi olmaqla Abxaziya, Osetiya, Prednestrovye, Çeçenistan kimi konfliktləri yaratmış Dövlət Təhlükəsizlik Komitəsi bu gün Rusiyanı idarə etmıkdə davam edir. KQB-nin əsəri olan Qarabağ konfliktinin həllinə Rusiyanın "kömək edəcəyi" məsələsi isə son on gündə gedən prosseslərdən sonra tam bəlli oldu. 

Prezidentlərin Soçi görüşünü şərh edən Qərb mediası isə Putinin "sülhməramlı missiyasının" Ukraynada baş verənlərin fonunda çox gülünc olduğunu vurğulayaraq, Krımı işğal edən və Donbas separatçılarını silahlandıran Putinə bu imicin heç yaraşmadığını yazıblar. Həqiqətən də, baş verənlərin fonunda Qarabağ düyününü salan KQB və onun generalının "sülhməramlı missiyası" sözün əsl mənasında çox gülünc görünür.

Qafqaz Ömərov

Ölkə.az