20 yanvar günü komediya: \"Park Cinema\", pul və milli dəyərlər

Bu gün informasiya məkanına bomba kimi düşən bir xəbər dünəni ümumilli matəm günü kimi qeyd edən vətəndaşlarımızı sözün əsl mənasında şoka saldı.

Məlumatda bildirilirdi ki, dünən, 20 yanvar günü paytaxtımızın ən məşhur kino klublarından olan "Park Cinema"da komediya filmləri nümayiş olunub. Filmə baxanları qoyaq bir kənara, elə təsəvvür edək ki, ora dünyadan, özündən, ölkəsindən, vətənindən, valideyinlərindən və milli-mənəvi dəyərlərindən xəbərsiz bəzi həddi-büluğa çatmamış məktəb uşaqları gedib. 20 yanvarın matəm günü olduğundan bixəbər olub gediblər əylənməyə. Bəs bu adı çəkilən "Park Cinema" rəhbərliyinə nə deyəsən? Onlar da həmin günün ümumilli matəm günü olduğundan xəbərsiz idilər?

Artıq 25 ildir ki, müstəqilliyimiz yolunda tökülən Vətən oğullarının qanı hələ də millətimizin və xalqımızın yaddaşında dünən baş vermiş hadisə kimi qalmaqdadır. 25 ildir ki, başda dövlət başçısı olmaqla bütün dövlət nümayəndələri 20 yanvar günü diplomatik korpusun nümayəndələri ilə birlikdə Şəhidlər xiyabanını ziyarət edir, milli müstəqilliyimiz yolunda verdiyimiz qurbanların əziz xatirəsini ehtiramla yad edirlər. Amma bütün bunlara baxmayaraq, gözlərini pul qazanmaq ehtirasi örtmüş bəzi "iş adamları" şəxsi mənafelərinə milli dəyərlərini və hətta insani hisslərini belə qurban verərək azad yaşamağımız uğurunda canlarını fəda etmiş şəxslərin ruhuna hörmətsizlik etməkdən belə çəkinmirlər.

Belə halların son zamanlar peyda olmuş bəzi əyləncə mərkəzlərinin rəhbərlikləri tərəfindən tez-tez təkrar olunması cəmiyyəti ciddi narahat etməyə başlayıb. Bu gün qazancını şəhidin əziz xatirəsindən yüksəkdə tutan vicdansızlar, sabah qan, can bahasına əldə edilmiş müstəqilliyimizə və dövlətçiliyimizə də eyni etinasızlığı nümayiş etdirə bilərlər. Bu tendensiyanın artması gələcəkdə bizi yenə tariximizdən, qan yaddaşımızdan qoparıb kiminlərinsə tapdağı altına sala bilər. Gənc nəslin xüsusi ilə diqqət mərkəzində olan "Park Cinema" kimi əyləncə mərkəzləri və kino klublarının rəhbərləri unutmamalıdırlar ki, öz əməlləri ilə yetişən nəsli də mənəvi cəhətdən kor qoyaraq onlara tariximizin bu şanlı səhifəsini unutdururlar. Həmin gün nəinki giriş qaplısına "Qanlı Yanvar" haqda bir plakat yapışdırmaq, olanlar haqqında əhaliyə məlumat vermək, hətta həmin gün komediya nümayiş etdirəcək qədər harınlayanlar unutmamalıdırlar ki, uğurunda qanı axmış şəhidin xatirəsinə hörmətsizlik edənlərin bu torpağın üzərində yeri yoxdur!

Baş redaktordan
Ölkə.az