Qərbin riyakarlığı: sepratizmin, terrorizmin təşviqçisi
Biz bu gün beynəlxalq hüququn qlobal təhlükəsizliyə, sabitliyə təhdidin məhz beynəlxalq hüququn və qlobal təhliükəsizliyə qarant rolunda çıxış edən ölkələr, onların nəzarətində olan təşkilatlar tərəfindən həyata keçirildiyinin şahidi olmaqdayıq. Bu ölkələr istənilən an öz maraqları naminə dünyanın istənilən nöqtəsində beynəlxalq hüququ ayaqlar altına ataraq qlobal təhlükəsizliyə təhdid yaradırlar. Lazım olanda isə qlobal təhlükəsizliyə təhdid edən ölkələrə qarşı ən sərt formada çıxış edirlər. Bu gün biz Ukraynada şahidi olmaqdayıq. Qərb öz maraqları naminə Ukrayna məsələsində Rusiya işğalının qarşısını almaq üçün ən sərt addımlar atmaqdan çəkinmir. Hətta Rusiya Avropanın beynəlxalq strukturlarından kənarlaşdırılır. Lakin təəssüflər olsun ki, biz bunun digər münaqişələrdə şahidi olmuruq. Əksinə, dünyanın başqa bölgələrində Qərb və dünyanın aparıcı ölkələri işğalı təşviq edib, beynəlxalq hüququ ayaqlar altına atıb, qlobal təhlükəsizliyə təhdidi üçün geniş imkanlar yaradırlar.
Ermənistan-Azərbaycan münaqişəsi bunun bariz nümunəsidir. Baxmayaraq ki, Azərbaycan 2020-cilin payızında 30 ildən sonra Ermənistanın işğalçılıq siyasətinə son verib, ərazi bütövlüyünü təmin etdi. Cənubi Qafqazda, ümumiyyətlə Avrasiya coğrafiyasında sıx və qarşılıqlı maraqlara uyğun şəkildə əməkdaşlıq üçün yeni imkanlar açdı. Hansı ki bu imkanlar bölgədə sülhün, sabitliyin təmin olunub, sıx əməkdaşlığa xidmət edir. Ancaq və lakin...
Cənubi Qafqazda sabitliyə xidmət edən addımların atılması, özlərini qlobal təhlükəsizliyin təminatçısı hesab edən bəzi Qərb ölkələrinin qıcığına səbəb oldu. Onlar hər vasitə ilə gərginliyin davam etməsində maraqlı olub, kövrək sülhü körükləməkdə davam etməkdədirlər. Bu məqsədlə həmin Qərb beynəlxalq hüquqa hayqırı nümayiş etdirərək, erməni kartından istifadə edərək sabitliyi pozmağa çalışırlar. Qərb bu məsələdə hələ də Azərbaycanın müəyyən hissəsində qalmaqda davam edən erməni separtçıları və terrorçularının tör-töküntülərindən faydalanmağa çalışırlar. Biz Qərbin son günlərdə bu istiqamətdə aktivləşməsinin şahidi olmaqdayıq. Qərbin aparıcı dövlət rəsmilərinin İrəvana və Bakıya davamlı zəngləri, Avropa strukturlarının və təşkilatlarının Azərbaycanla bağlı qərəzli mövqlər sərgiləməsi bunun bariz nümunəsidir.
Ən sonuncusu isə hər zaman erməni mövqeyindən çıxış edən və erməni lobbisinin nəzarətində olan “Freedom House”un Azərbaycana qarşı beynəlxalq hüquqa zidd olan tərtib etdiyi "hesabatdır". Belə ki, adı çəkilən təşkilatın “2021-ci ildə Dünyada Azadlıq” hesabatında beynəlxalq hüququn müddəaları kobud şəkildə pozularaq Azərbaycanın ərazi bütövlüyünü və suverenliyini pozan hallara yol verilib. Təşkilatın hazırladığı "hesabat"da 210 ölkə və ərazidə insanların siyasi hüquqlara və vətəndaş azadlıqlarına çıxış imkanları qiymətləndirilir. Həmin "hesabat"da Azərbaycana siyasi hüquqların təmin olunması və ya vətəndaş azadlığı indeksi ilə bağlı verdiyi qiyməti bir yana, ölkəmizin ərazi bütövlüyünə və suverenliynə hörmətsizlik nümayiş etdirilib. Bütün qırmızı xətləri keçən adıçəkilən təşkilat artıq iki ilə yaxındır mövcud olmayan "Dağlıq Qarabağı" dünyanın müstəqil subyekti kimi təqdim edib. Hansı ki 2020-ci ilin noyabrından etibarən belə inzibati ərazi artıq yoxdur və Qarabağ münaqişəsi də tarixin arxivinə qovuşub. Amma hələ də qocalmış Avropa öz çirkin, məkrli oyunları naminə ölüyə can verməklə məşğuldur.
“Freedom House”un bu addımı birbaşa beynəlxalq hüququn kobud surətdə pozulması, ayaqlar altına atılması ilə yanaşı, qlobal təhlükəsizliyə təhdiddir. Hələ bu azmış kimi terrorçu, separatçı rejimin insan hüquq və azadlıqlarının Azərbaycandan daha yaxşı təmin olunduğu qeyd olunub.
Sənəddə Azərbaycana 9 bal verildiyi halda, Qarabağdakı terrorçulara 36 bal verilib.
“Freedom House” "fəaliyyətini" bununla bitirməyib, təşkilat eyni zamanda Abxaziyada, Cənubi Osetiyadakı separatçı rejimləri müstəqil dövlət kimi hesabata salıb. Qərb təşkilatlarının beynəlxalq hüquqa olan bu "sevgi"si dünyada çox pis presedentlərin ənənəsinin qoyması deməkdir. Adı çəkilən təşkilatın növbəti hesabatlarında yəqin ki, Donbas və Luqanskla bağlı da müddəalar əksini tapar.
Bütün bunlar onu deməyə əsas verir ki, qlobal təhlükəsziliyə təhdid və beynəlxalq hüququn kobud surətdə pozulmasının, ayaqlar altına atılmasının əsas səbəbkarları elə özlərini bu dəyərlərin müdafiəçisi hesab edən ölkələrdir. “Freedom House”un son hesabatı isə riyakarlığın, simasızlığın bariz nümunəsidir.
Mürtəza Bünyadlı
Ölkə.Az
