Anti-Azərbaycan qüvvələrin əlində vasitə olan Mənsimov nə istəyir...
Biz zaman-zaman Azərbaycanın istər regional, istərsə də beynəlxalq müstəvidə uğurlara imza atdığı bir zamanda anti-Azərbaycan qüvvələrin və onların əlaltıların peyda olub, əldə edilən uğurlara kölgə salmaq və yaxud bunu əngəlləməyə çalışdığının şahidi oluruq. Rusiya-Ukrayna müharibəsi fonunda Azərbaycanın istər Ermənistan-Azərbaycan münaqişəsinin həlli istiqamətində atdığı ciddi addımlar, istərsə də yeni dünya düzənində oynadığı əhəmiyyətli rol bir çox qüvvələri ciddi narahat edir.
Bu anti-Azərbaycan qüvvələr, erməni lobbisi daha çox “sapı özümüzdən olan baltalardan” istifadə etməyə üstünlük verərək, ölkə daxilində çaşqınlıq yaratmaq və görülən işlərə, ölkə başçısı tərəfindən həyata keçirilən siyasətə kölgə salmağa çalışırlar. Odur ki Azərbaycanın inkişafını sevməyən qüvvələr bu dəfə daha fərqli bir taktikaya əl atıblar. Belə ki, həmin anti-Azərbaycan qüvvələr və erməni lobbisi bir müddət əvvəl dələduzluq fəaliyyətinə görə məhkumluq həyatı yaşayan, Türkiyədə fəaliyyət göstərən iş adamı Mübariz Mənsimovdan istifadə etməyə üstünlük verib.
Bir çoxları hesab edir ki, bu insan məhkumluq həyatı zamanı etdiyi cinayətlər və səhvlərdən nəticə çıxaracaq. Amma bunun tam əksi müşahidə edilməkdədir. Mübariz Mənsimov yenidən Azərbaycanı hədəf seçərək qarayaxma ilə məşğuldur. Mənsimovun mətbuata verdiyi sonuncu müsahibə onun tam iç üzünü açaraq ifşa etdi və kim olduğunu ortaya qoydu. Özünü milləti üçün canını “fəda“ edən, xeyirxah, insanlara əl tutan şəxs kimi nümayiş etdirməyə çalışan Mənsimov əslində “göz düzəltmək yerinə, qaşı da vurub çıxarmaqla” daha çox barəsində kriminal bir obraz formalaşdırmış oldu. Kriminal obrazı yaratmaq bir yana, sətiraltı Azərbaycan dövlətçiliyinə qarşı da təhdidlərdən çəkinmədi.
Azərbaycan cəmiyyətinə o da bəllidir ki, Mənsimov Azərbaycanı sevməyən qüvvələrin əlində bir vasitədir. Əslində, danışan Mənsimov özü yox, ona havdarlıq edən Azərbaycanı sevməyən qüvvələr və erməni lobbisi idi. Həmin qüvvələrə Mənsimov vasitəsi ilə Azərbaycana yönəlik məkrli planlarının onun vasitəsi ilə mesaj formasında cəmiyyətə çatdırmaq idi. Amma unudurlar ki, belə cəhdlərlə Azərbaycan cəmiyyətindəki həmrəyliyi, birliyi parçalayıb, ictimai-siyasi sabitliyi pozmağa nail olmayacaqlar. Azərbaycan cəmiyyəti sayıq bir cəmiyyətdir və kimin necə nəfəs aldığını və hansı məqsədlərə qulluq etdiyini yaxşı bilir. Odur ki, Mənsimov kimilər açıqlamları ilə əslində özlərini ifşa etmiş olacaqlar.
Ölkə.Az
