Mətn ölçüsü:
  • 100%

Xankəndi Araikçilərdən təmizlənir: Paşinyanı Əliyevə təslim olmaqda suçlayırlar

Erməni separatçılar rəsmi İrəvanın onlara dəstək ola bilməyəcəyinə artıq tam əmin olublar... Onların Kremlə olan ümidləri isə Rusiyanın Ukraynada düşdüyü “savaş bataqlığı”nın dibinə doğru yuvarlanmaqdadır...

"Ölkə.az" musavat.com-a istinadla bildirir ki, Ermənistanın kənar himayə olmadan mövcudluğunu qoruya biləcəyinə rəsmi İrəvan da ciddi şəkildə şübhə edir. Ona görə də, Paşinyan hakimiyyəti istənilən kənar təsir qarşısında acız vəziyyətə düşür. Və Cənubi Qafqazda maraqları olan dövlətlər üçün Ermənistan “regional zəif bənd” rolunu oynamaq məcburiyyətində qalır.

Təbii ki, belə vəziyyət Ermənistanın xarici siyasətinə birbaşa təsir göstərir. Rəsmi İrəvan müstəqil siyasət yürütmək şansını qazana bilmir. Nəticədə, Paşinyan hakimiyyəti Ermənistanı qorumaq üçün ABŞ və Qərbin, eləcə də, Rusiyanın təlimatlarını eyni vaxtda yerinə yetirməyə çalışır.

Belə vəziyyətdəsə, rəsmi İrəvan Qərbin və Rusiyanın regional maraqlarından faydalanmağa cəhd göstərdiyindən, Ermənistan yalnız "sürüşkən xarici siyasət" yürüdür. Yəni, eyni vaxtda həm Rusiyanın, həm də ABŞ və Qərbin dəstəyini, himayəsini qazanmağa çalışır. Halbuki, belə davranış Ermənistanın özü üçün də ciddi geopolitik təhlükələr vəd edir.

Maraqlıdır ki, bundan öncə, yəni aprel ayında Ermənistan baş naziri Nikol Paşinyanın Moskvaya səfərinə paralel olaraq, xarici işlər naziri Ararat Mirzoyan da ABŞ-a səfər etmişdi. Erməni nazir ABŞ-ın Ermənistanın ən yaxın müttəfiqi olduğunu bəyanlamışdı. Və bu bəyanat məhz baş nazir N.Paşinyanın prezident V.Putin qarşısında aciz duruma düşərək, Ermənistanın Rusiya ilə müttəfiqliyə sadiq olduğunu sübut etməyə çalışdığı bir vaxtda verilmişdi.

dsdsdsd.jpg (944 KB)Nə qədər qəribə də olsa, rəsmi İrəvan indi də təxminən eyni taktikanı təkrarlamağa çalışır. Yenə də baş nazir Nikol Paşinyan Moskvaya səfərə gedib. O, Rusiyanın Ermənistanın ən yaxın müttəfiqi olduğunu vurğulayıb. Əvəzində isə Ermənistanın xarici işlər naziri A.Mirzoyan Brüsselə üz tutub. Böyük ehtimalla rəsmi İrəvan Avropa Birliyi ilə keçiriləcək tədbirin məhz baş nazir Nikol Paşinyanın Moskva səfəri ilə eyni vaxtda baş tutması üçün əlindən gələn hər şeyi edib.

Belə anlaşılır ki, Ermənistan eyni vaxtda həm Rusiya, həm də Qərb arasında xaotik trayektoriya cızır. Hər iki tərəf ilə yaxın münasibətlərdə qalmağa çalışır. Paşinyan hakimiyyəti bir tərəfdən Rusiyanın təlimatı ilə Brüssel anlaşmaları üzrə sülh sazişinin hazırlanması prosesini pozur. Digər tərəfdən isə Brüssel prosesindən imtina etmədiyi barədə görüntü yaratmağa cəhd göstərir.

Təbii ki, həm Kremldə, həm də Brüsseldə rəsmi İrəvanın "sürüşkən xarici siyasət" vərdişlərinə bələddirlər. Ancaq hələlik hər iki tərəf Ermənistandan öz məqsədləri üçün istifadə etməyə üstünlük verir. Və Paşinyan hakimiyyətinin güclü tərəfə yaxınlaşıb, nisbətən zəif mövqedə olana xəyanət edəcəyini də anlayırlar.

Ancaq inkaredilməz bir reallıq da var ki, rəsmi İrəvanın kimlər tərəfindən himayə olunması Ermənistanın indiki geopolitik durumunu dəyişə bilməz. Ermənistanın xarici işlər naziri A.Mirzoyan "Qarabağ problemi"ni və regional təhlükəsizlik məsələlərini Avropa Birliyi də daxil olmaqla, hər kəslə müzakirə edə bilər. Ancaq bu, Cənubi Qafqazda heç nəyi dəyişməyəcək.

Çünki "Qarabağ problemi" hazırda yalnız Azərbaycanın daxili işidir. Rəsmi Bakı bu mövzu nə Ermənistan, nə Rusiya, nə də Avropa Birliyi ilə müzakirə etmək niyyətində deyil. Və Paşinyan hakimiyyətinin bu əhəmiyyətini artıq itirmiş mövzunu vaxtaşırı gündəmə gətirməyə çalışması da, böyük ehtimalla Ermənistanın daxili aiditoriyası üçün nəzərdə tutulub.

553ca3cd-f6e8-4b12-8e68-cdd0639acd79.jpg (258 KB)Regional təhlükəsizlik məsələlərinə gəldikdə isə, Ermənistan bu mövzuda da faydalı ölkə sayıla bilməz. Çünki, Ermənistan Cənubi Qafqazda geopolitik iradə sahibi deyil. Ermənistanın gələcək taleyi belə, rəsmi Bakının verəcəyi qərarlardan birbaşa asılıdır.

Ona görə də, nə baş nazir Nikol Paşinyanın son Moskva səfərindən, nə də xarici işlər naziri Ararat Mirzoyanın Brüssel gəzintisindən hər hansı yeni nəticə gözləmək sadəlövhlük olardı. Cənubi Qafqazda, eləcə də Azərbaycan-Ermənistan sülh sazişinin hazırlanması prosesində şərtləri və gündəmi məhz rəsmi Bakı müəyyən edir. Bunu həm Ermənistan cəmiyyətində, həm də rus sülhməramlıların müvəqqəti dislokasiya olunduğu Xankəndi və ətraf bölgədəki separatçılar arasında yayılan qənaət də təsdiqləyir.

Məsələ ondadır ki, Ermənistan Azərbaycanın sülh sazişinin imzalanması üçün diqtə etdiyi 5 şərti artıq qəbul edib. Rəsmi İrəvanın daxili aiditoriyaya hesablanmış 6 cavab təklifi isə heç bir əhəmiyyət daşımır. Azərbaycanın rəsmi dairələri həmin təklifləri ümumiyyətlə, müzakirə belə, etmək niyyətində olmadıqlarını qətiyyən gizlətmirlər.

Bəzi məlumatlara görə, Paşinyan hakimiyyətinin Azərbaycanın 5 şərtini qəbul etməsindən sonra Xankəndi və ətraf bölgədə olan separatçılar olduqca ciddi çaşqınlıq keçirirlər. Qarabağdakı separatçıların təşsilçisi Metaxe Akopyanın Ermənistan mətbuatına müsahibəsi də məzmun baxımından, bunu təsdiqləyir. Çünki, o, Araik Arutyunyanın və yaxın ətrafının Xankəndi və ətraf bölgədə uzun müddət qala biləcəklərinə əmin olmadığını açıq şəkildə etiraf edir.

3fdc23ab-eca4-47df-a1d5-d758188a54b5.jpg (256 KB)Metaxe Akopyanın dediklərindən aydın olur ki, Ermənistanın Azərbaycanın 5 təklifinə cavab verməsindən sonra Xankəndidən səs-küylü xəbər gözləmək olar. Onun dediklərindən belə anlaşılır ki, qondarma “dqr”in bütün “nazirləri”, “prezidenti”, “deputatları” tezliklə Xankəndi və ətraf bölgəni tərk etməli olacaqlar. Və bu, Azərbaycan ərazisində erməni separatmizminin ömrünə o qədər də çox qalmadığını göstərir.

Məsələ ondadır ki, separatçı Metaxe Akopyan rəsmi İrəvanın Azərbaycanın beş şərtinə cavabının təfərrüatlarını yalnız Bakının onlara reaksiyasından sonra ictimaiyyətə açıqlaması artıq ermənilərə açıq işarədir: “İndi nəsə etməyə cəhd göstərmək belə, mənasızdır. Bu bəndlərdə “dqr” lehinə heç bir müddəa görmədim. Ümumiyyətlə, bizə göstərildi ki, bütün bunların artıq heç biri olmayacaq. Ermənistan Qarabağı rəsmən Azərbaycanın bir hissəsi kimi tanıyıb. Bu, onu göstərir ki, biz hamımız Ermənistana qayıtmalı olacağıq”.

Göründüyü kimi, erməni separatçıları Ermənistana qayıtmağa hazırlıq əhval-ruhiyyəsində kökləniblər. Ermənistanın separatçılara dəstək ola bilməyəcəyini onların özləri də anlayırlar. Kremlə olan ümidlər isə Rusiyanın Ukraynada düşdüyü “savaş bataqlığı”nın dibinə doğru yuvarlanmaqdadır.

Bu baxımdan, rəsmi Bakının Azərbaycanı erməni separatizmindən təmizləməyə çox yaxın olduğu artıq qətiyyən şübhə doğurmur. Yəni, erməni separatçılar Paşinyan hakimiyyətini rəsmi Bakıya təslim olmaqda suçlasalar da, Xankəndi və ətraf bölgənin silahlı erməni terrorlardan təmizlənməsi artıq qaçılmazdır.