İrəvanın sərsəmliyi və ya məsuliyyətdən boyun qaçırması - Baha başa gələcək

Ermənistan Azərbaycanla müharibədə ağır məğlubiyyətə uğradıqlarını etiraf edib acı nəticələrindən dərs çıxarmaq əvəzinə yenə də təxribatçı fəaliyyətləri ilə sülhü pozmağa çalışırlar. Bunun üçün də İrəvan uğradıqları ağır məğlubiyyətlərin məsuliyyətini üzərilərindən atıb  sülhdən yayınmaq üçün ağlasığmaz  sərsəm fikirlər ortaya atmaqla məşğuldurlar. Növbəti belə bir sərsəm fikri Ermənistanın Təhlükəsizlik Şurasının katibi Armen Qriqoryan yenidən dilə gətirib. Sərsəm Qriqoryan yenə də məğlubiyyətin səbəbini özlərində deyil, kənarda axtarmağa başlayıb. Qriqoryan deyib ki, Rusiya Qarabağı Ermənistaın əlindən alıb Azərbaycana verdi. Belə bir sərsəm fikirlər səsləndirən Qriqoryanın dedikləri "adımı sənə qoyum, səni yana-yana qoyum" zərb-məsəlini xatırladır. Çünki Ermənistan tarixən hansısa xarici güclərin və ölkələrin birbaşa dəstəyi, onların hərbçilərinin arxasında gizlənərək Azərbaycan torpaqlarını işğal ediblər.  İki yüz ildən artıq müddətdə ermənilər xarici güclərin hərbi qüvvələrinin iştirakı ilə tarixi Azərbaycan torpaqlarında əldə alət olan bir uydurma, forpost Ermənistan dövləti yaradıblar. Əgər Ermənistanın arxasında hər hansı xarici güc olmasaydı işğal siyasətini həyata keçirə bilməzdi. İkinci Qarabağ savaşından öncə Azərbaycan Prezidenti cənab İlham Əliyev də dəfələrlə bəyan edib ki, Ermənistanın hünəri varsa, arxasındakı güclərdən imtina edib təkbaşına Azərbaycanla qarşı-qarşıya gəlsin və o zaman bəlli olacaq ki, kim kimdir. Kim güclüdür, kim zəif. Amma zaman yetişəndə Azərbaycan Ermənistanın arxasındakı himayədarların dəstəyinə baxmayaraq öz qüdrətini döyüş meydanında sübut etdi. Qısa zamanda Azərbaycan ordusu yaradılan mifləri darmadağın edərək ağır onları məğlubiyyətlərə uğratdı. 2023-cü ilin sentyabrında isə Azərbaycan ordusu rus hərbi kontingentinin nəzarətində olan ərazidə kiçik mobil qüvvə ilə həyata keçirdiyi antiterror əməliyyatı isə heç bir sutka da davam etmədi. 44 günlük müharibədə olduğu kimi, yendə də mülki insanlara zərər vermədən erməniləri ağır məğlubiyyətə uğradıb ağ bayraq qaldırmaq zorunda buraxdı.

Ermənistanın bu sərsəmliyi anlamaq olar... Çünki Ermənistan "seyid cəddinə" ümid olan kimi, ümid edirdilər ki, nə qədər şıltaqlıq etsələr də, himayədarları onları müdafiə edəcək. Lazım onların əvəzində vuruşacaq, topraq alacaq və ermənilər də sonradan onların arxasından çıxaraq özlərini "qəhrəman" elan edəcəklər. Amma zaman keçdi himayədarlar da ermənilərin bu niyyətini anladı. Hətta istəsələr belə, buna gücləri yetmədi. Heç uzaq tarixə nəzər salmaq lazım deyil. İstər İkinci Qarabağ savaşı zamanı Ermənistana hansı ölkələrin silah verməsi, istərsə də 2020-ci il 10 noyabr bəyanatından sonra  Azərbaycan ərazisinə sülhməramlı adı altında gələn rus hərbi kontingentinin 2023-cü ilədək Qarabağdakı erməniləri silahlandırılmasına göz yumması faktına nəzər yetirmək kifayətdir. Azərbaycan dəfələrlə belə təxribatçı hərəkətlərə son qoyulmasını tələb etdi. Lakin nə ermənilər, nə də onlara bu işdə yardım edənlər eşitmədi. Səbri dolan Azərbaycan yenə də "dəmir yumruğu" işə salmalı oldu və düşmən darmadağın edildi.

Təbii ki, ermənilər kimlərinsə əvvəllərdə olduğu kimi yenə də kimlərinsə onların əvəzinə döyüşəcəyini gözləyirdi, amma olmadı.  

Cənab Prezident İlham Əliyevin bəyan etdiyi kimi, iki daş arasında sığışan Ermənistan artıq başını itirib.  Azərbaycan tərəfi böyüklük nümayiş etdirib Ermənistanı üzləşdiyi bu ağır vəziyyətdən çıxarmaq üçün sülh əlini uzatmasına baxmayaraq İrəvan əlini hələ də geri çevirməkdədir. Əgər İrəvan xəyallarından vəziyyəti əks istiqamətə dəyişəcəklərini keçirirlərsə, yanılırlar. Artıq o keçmiş dövrü geri qaytarmaq mümkün deyil. Ən yaxşı variant Ermənistanın məsuliyyəti üzərlərindən atmaq yox, səhvlərini etiraf edib Bakının şərtləri daxilində sülhü imzalamaqdır. 

Mürtəza
Ölkə.Az