Türkiyə ordusuna və bayrağına hücumlar nədən xəbər verir?

Son vaxtlarda Yaxın Şərdə münaqişə coğrafiyasının genişlənməsini müşahidə etməkdəyik. İsrail, Qərb və bəzi digər güclər bölgədə öz planlarını reallaşdırmaq üçün yeni-yeni münaqişə, böhran və gərginlik ocaqları yaratmaqdadırlar.

Bu güclər ilk növbədə beynəlxalq aləmin, o cümlədən bölgədəki hadisələrə daha həssas yanaşan, baş verənlərə qətiyyətli mövqe sərgiləyən Türkiyənin proseslərə təsir gücünü zəiflətməyə çalışırlar. İsrail-Livan münasibətlərinin gərginləşməsi, Suriya ərazisində terrorçu PKK dövlətinin yaradılma planı və bunun tərkib hissəi olaraq yenidən Türkiyə-Suriya münasibətlərini gərginləşdirməyə çalışırlar.

İsrail, Qərb və digər maraqlı güclər onu da yaxşı anlayırlar ki, Yaxın Şərqdəki bütün bu oyunları poza biləcək və bu gücə malik bir ölkə varsa, o da Türkiyədir. Məhz Türkiyə həmin planları bir-bir iflasa uğratmaqdadır.

Ankaranın son günlərdə Dəməşqlə münasibətlərinin normallaşdırılması istiqamətində atdığı addımlar da bu qəbildən olan məsələdir. Bölgədə çirkli niyyətlərini həyata keçirən qüvvələr yaxşı başa düşürlər ki, Ankara ilə Dəməşq arasında münasibətlərin normallaşması həm Suriyanın parçalanması, həm də PKK terrorçu dövlətinin yaranması kimi planları iflasa uğradacaq. Bu da təbii ki, həmin gücləri çox ciddi şəkildə narahat etməkdədir. Ona görə də iki ölkə arasında münasibətləri yenidən pozub gərginlik yaratmaqla niyyətlərini həyata keçirmək istəyirlər. Kayseridəki hadisələr və bunun Suriyada da davam etdirilməsi, Afrində bəzi mülki suriyalıların Türkiyə ordusuna hücumunun təşkili və hətta silahdan istifadə edilməsi, Türkiyə bayraqlarının cırılması və sair bütün bunlar planlaşdırılan böyük təxribatın tərkib hissəsidir.

Təəssüflər olsun ki, hər iki tərəfdə bu təxribata uyanlar oldu. Lakin Ankaranın çevik və sərt reaksiyası nəticəsində bunun qarşısı anındaca alındı.

Türkiyə prezidenti Rəcəb Tayyib Ərdoğan da məsələyə sərt reaksiya verərək bəyan etdi ki, nifaq toxumu səpən çıxışılara, faşizmə, irqçi vandalizmə və təxribatlara boyun əyməyəcəklər. "Biz bayrağımıza uzanan murdar əlləri qırmağı bildiyimiz kimi, ölkəmizə sığınan məzlumlara uzanan əlləri də necə qırmağı bilirik", - o deyib.

Prezident Ərdoğan da baş verənlərin çirkin oyunların tərkib hissəsi olduğuna işarə edərək bildirdi ki, həmin güclərin cəhdləri boşa çıxdı. Ankara bu güclərin indiyədək bölgədəki çirkin niyyətlərini boşa çıxardığı kimi bundan sonra da iflasa uğradacaq. Suriya ərazisində də yeni bir PKK-nin İŞİD-lə birlikdə qurmaq istədiyi terror dövlətinin yaranmasına imkan verilməyəcək.
Lakin onu da unutmaq olmaz ki, bu çirkin planlaır həyata keçirənlər və anti-Türkiyə qüvvələr sakit dayanmayacaq. Odur ki, bu oyunların alətinə çevrilməmək üçün Türkiyə və Suriya daha diqqətli addımlar atmalıdır.

Mürtəza
Ölkə.Az