Putin danışır, Qərb dinləyir
"Mən ABŞ və Avropa ilə əməkdaşlığa açığam və düşmənlər axtarmıram".
Bu bəyanat Rusiya prezidenti Vladimir Putinin Federal Şuraya ünvanladığı müraciətdə əks olunub. Putinin bu bəyanatı gözlənilməz olduğu qədər də özündə bir sıra mətləbləri gizlədir.
Ölkə.Az bu bəyanatın pərdəarxası məqamlarını araşdırıb. Putin bu bəyanatla əslində nə demək istəyirdi?
"Der Spiegel" dərgisi bu bəyanatı yeni notda yazılmış köhnə mahnı kimi xarakterizə edir. Jurnal iddia edir ki, Putinin 69 dəqiqəlik çıxışı daha çox rusların əhvalını yüksəltməyə hesablanmışdı. Putin 19 milyon rusun həddindən artıq kasıb yaşadığını bilərək, bizdə heç də hər şey pis deyil bəyanatı fonunda həmçinin sülhsevər və dialoqa açıq birisi kimi görünürdü deyə "Der Spiegel" yazır.
Putin çıxışında Qərblə münasibətlərə cəmi 8 dəqiqə ayırır və Hələb, Ukrayna kimi prioritet məsələlərə toxunmur. Əsas vurğunu isə Donald Trampla əməkdaşlığa hazır olduğuna dair bəyanatına vurur.
Putin ötənilki analoji çıxışında da ABŞ haqqında bir kəlmə də işlətmir. Amma 2014-cü ildəki bəyanatında Vaşinqtonu Maydan hadisələrinin birbaşa təşkilatçısı və Ukrayna hakimiyyətinin qızışdırıcısı kimi qələmə verir.
Rusiyalı politoloqlar Putinin nisbətən "yumşaldılmış" bəyanatını bir neçə səbəblə izah edirlər.
Birincisi Putin son zamanlar bir neçə Avropa ölkəsində Rusiyameylli liderlərin hakimiyyətə gəlməsini bilir və bununla da Rusiyaya qarşı sanksiyaların ləğvi üçün belə yola əl atmasını göstərirlər.
Rusiya Dumasının üzvü Nikoloy Kovalyev iddia edir ki, Putin Qərb siyasətində fasilə rejiminə keçib:
"O, əvvəlcə yeni ABŞ hakimiyyətinin Qərbə qarşı münasibətinin necə olduğunu müəyyənləşdirmək istəyir. Bundan sonra özünə yeni yol xəritəsi seçəcək".
Amma bir sıra ekspertlər isə bunu inandırıcı saymır. Onlar hesab edir ki, Rusiyanın Qərblə münasibətlərinin gərginləşməsi fonunda Putinin reytinqi həmişə yüksəlir.
Putin müraciətində həmçinin Qərbin və ABŞ-ın əməkdaşlıqdan imtinası halında ayaq yeri də qoyur. O, Moskvanın Pekinlə strateji əməkdaşlığından ağızdolusu danışaraq Qərbə onu düşmən seçəcəkləri halda Çini də qarşılarına alacaqları siqnalını verir.
Putinin çıxışında ən diqqət çəkən məsələlərdən biri də korrupsiyayla mübarizə sahəsidir. Rusiya lideri burada da ikibaşlı bəyanatları ilə Qərbin diqqətini özünə çəkir.
Maliyyə naziri Aleksey Ulyakovun həbsini yüksək qiymətləndirən Putin, rüşvətə bulaşmış məmurlarla mübarizənin şəxsə və vəzifəyə baxmayacağını bəyan edir. Bu həm sadə ruslarda ümid qığılcımı yaratmaqla yanaşı Qərbə də bir işarədir. Açıqlaması isə belədir: "Məni diktator və antidemokrat kimi qələmə versəniz də, mən təmizləmə işi aparıram və komandamı korrupsioner məmurlardan təmizləyirəm".
Ölkə.Az bildirir ki, Qərb mətbuatı Putinin müraciəti zamanı diqqət çəkən məqamlardan birinin də Baş Nazir Dmitriy Medvedevin mürgüləməsi olduğunu yazır.
Baş nazirin artıq 3 ildir ki, ardıcıl bu çıxış zamanı mürgülədiyini yazan avropalı jurnalistlər bunu Putinin vaxtilə verdiyi bəyanatla izah edirlər. "Biz Medvedevlə növbə ilə yatırıq. O yatanda ölkəyə mən, mən yatanda isə Dmitriy nəzarət edir".
Bu həm də Qərbə bir mesaj kimi də qiymətləndirilir. Putin oyaq olduğunu nəinki Rusiyaya, bütün dünyada baş verənlərə diqqət yönəltdiyinə işarə verir. Üstəlik Putinin yanında Çinlə yanaşı Avropanın küsdürdüyü Türkiyə də var. Görünən odur ki, "Rus ayısı" oyaqdır.
