Müəllimlərin orta aylıq əməkhaqqısı 830 manata çatacaq - 83 milyon pul ayrıldı

Son 2 il ərzində keçirilən sertifikatlaşdırma imtahanlarının nəticələrinə əsasən, 2023-cü ilin IV rübü üzrə təhsilverənlərin orta aylıq əməkhaqqısı 830 manata çatacaq.

Bu barədə Ölkə.Az-a Elm və Təhsil Nazirliyindən məlumat verilib. Bildirilib ki, İmtahanda 30-50 bal arası, eləcə də 51 bal və daha yuxarı nəticə göstərmiş şəxslər üzrə isə bu göstərici daha da yüksək olacaq. 

Belə ki. sertifikatlaşdırmada yüksək nəticə göstərənlər (35% əlavə alanlar) üzrə 1270 manat, sertifikatlaşdırmada uğur qazanmış heyət üzrə (10% əlavə alanlar) 1030 manat, sertifikatlaşdırmada iştirak etməyən heyət üzrə orta aylıq əmək haqqı 750 manat təşkil edəcək. Beləliklə, müəllim heyəti üzrə orta aylıq əməkhaqqı 830 manat təşkil edəcək. 

Həmçinin qeyd edilib ki, sertifikatlaşdırmanın nəticələrinə əsasən, əməkhaqqı artımı üçün 2022-ci ildə 8.2 milyon manat, 2023-cü ildə 32.3 milyon manat vəsait ayrılmışdısa, bu rəqəm gələn il 83.1 milyon manat təşkil edəcək.