Bu işi saf məmurlar görməlidir, gəlib nökərçilik edirlərxa0 - Şeyxdən SOS
Bu sözləri Ölkə.Az-a açıqlamasında Xalq artisti, aktyor, rejissor Şeyx Əbdül Mahmudov deyib.
"Bu mənim deməyimlə, sizin yazmağınızla düzələn şey deyil, sistemli şəklində həll olunmalıdır.
Maariflənmək məsələmizdə, televiziyalardakı problemlərdə, ideologiyamızda, təbliğatımızda artıq SOS harayı qaldırmaq lazımdır. Belə məsələlər gündəlik müzakirə olunmalıdır. Bu işi peşəkar, mənəviyyatlı, əxlaqlı, milli ruhlu insanlar, qeyrətli dövlət adamları, saf niyyətli məmurları yoluna qoymalıdır. Yoxsa hara gedirik mən bilmirəm" - o söyləyib.
Mənəvi dəyərlərimizin korlandığını deyən Xalq artisti hesab edir ki, bununla bağlı ciddi ideoloji iş aparılmasına ehtiyac var:
"Kənddən 3-5 il arvad olan, 2-3 uşaq doğan qadın bu gün kəndini, ailəsini atıb qaçıb şəhərə gəlir. Bəhanə edir ki, orada iş yoxdur, güzəran yoxdur. 5-10 illik evli ata öz valideynlərini, xanımını, uşaqlarını atır, gəlir küçələrdə avaralanır, siqaret çəkir, kiməsə nökərçilik edir. Ən dəhşətlisi budur ki, onların sayı 5-10 nəfər deyil, yüzlərlə, minlərlədir.
Bunun səbələri arasında sözsüz ki, bizim ideologiyamızın təbliğatının zəif olması, sosial təminatımızın acınacaqlı vəziyyətdə olması, təhsil sistemimizin pis gündə olması durur. Bundan məharətlə istifadə edib qazanc əldə edənlər və təxribat üçün istifadə edənlər bizə xəyanət edənlərdir. Ağsaqqal bir insan kimi görürəm ki, nadanlıqdan korafəhmlikdən, savadsızlıqdan, primitiv düşüncədən gəlmə şeylər var.
Bu məsələni normal ziyalılarımızın, dövlət adamlarımızın qarşısında qaldırmaq lazımdır.
Bizim millətdə "qeyrət" adlı bir ölçü var. Bizdə mənəvi dəyərlər başqa millətlərdən çox-çox yüksəkdir. Bu qədər korlayırlar, amma yenə də onu qoruyub saxlayırıq.
Necə ki bu millət 44 günlük müharibədə bir araya gəldi, antiterror əməliyyatları zamanı birlik oldu, qanını tökməkdən qorxmadı, hamısı əlində silahla dedilər ki, xalqı, torpağı müdafiə etmək lazımdır. Bu da eyni cəbhədir. Qan tökməyə ehtiyac olmasa da, ciddi təmizliyə ehtiyac var. Bu bizim daxilimizdə olan şeydir, kənar qüvvə yoxdur".
Billurə Yunus
