"Ən pisi və ağrılısı uşaq ikən məşhurlaşmaqdır, ona ürəyim ağrıyır"

"Məsuliyyət və populyarlığın dalğasını qəbul edə bilməlisən. İndiyə qədər bunun altından çıxa biləcək barmaq sayda adam olub".

Ölkə.Az xəbər verir ki, bu sözləri dinşünas, bloger Fərid Abdulla deyib. O bildirib ki, bunlardan ən pis və ağrılı olanı uşaq ikən məşhurlaşmaqdır:

"Makaley Kalkindən ("Evdə tək" filminin qəhrəmanı-red.) tutmuş çox sayda uşaqlar nəhəng məşhurluq sunamisinin altında əziliblər. İmkanı olan kəslər kütlədən qaça bilir, bəziləri bacara bilmir. Psixi xəstəliklərə, narkotik və alkoqol asılılığına məruz qalırlar.

İndi tiktokda məşhurlaşan Adəm adlı uşağı gördükdə, ona ürəyim ağrıyır. Adamın məşhurlaşma səbəbi vunderkindlik deyil. Yəni ağıl, İQ, savad ilə məşhurlaşmayıb. Hərçənd rastınıza çıxmış bütün fövqəl istedadlı uşaqlar daha sonra məhv olub gedirlər. Adam normal uşaqlığını yaşamalıdır. Bəzən valideyn, bəzən bukmeykerlər, maklerlər, bəzən cəmiyyət buna imkan vermir. Bizi əyləndirməli, qazanc gətirməlisən - uğur budur".

İlahiyyatçının fikrincə, tiktokda məşhurlaşan Adəmə ciddi yardım lazımdır:

"Nə çox videosunda ağlayır, camaatdan qaçır. Camaat isə onunla əylənirlər. Bir az bezib başqa adam axtaracaqlar. Zatən uşağa düz-əməlli tərbiyə verilməyib. Ara uşağı olmağa məcbur qalıb. Amma camaat da bilmədən onu daha da fəlakətə sürükləyir. Təəssüf ki, valideynlər də bunu gözardı edirlər", - deyə o bildirib.