Öz ərizəsi ilə işdən çıxanlar da təminatlarını ala bilər  - AÇIQLAMA

"İnsanlar arasında yayılmış yanlış fikirlərdən biri də budur ki, işçi öz ərizəsi ilə işdən azad olunarkən işlədiyi müəssisədən qanunla ona verilmiş təminatları ala bilməz". 

Ölkə.Az xəbər verir ki, bunu vəkil Vamiq Şükürov deyib. O bildirib ki, bu fikir tamamilə yanlışdır:

"Bildiyiniz kimi qanuna görə işçi işdən azad olunarkən o, almadığı əmək haqqını, istifadə etmədiyi məzuniyyət günlərinin əvəzini, əmək haqqına əlavələri, yaxud qanunla ona verilməli digər ödəmələri iş yerindən almaq hüququna malikdir. Qanun bu təminatları almaqda işçilər arasında hər hansı fərq qoymur. Yəni öz ərizəsi ilə işdən azad olunan şəxslər də bu hüquqlara malikdirlər. Bilin ki, bu yanlış fikirdir".  

Hüquqşünas işəgötürənlər istifadə etdiyi daha bir qanunsuz üsuldan da söz açıb:

"Müəyyən təyziqlər nəticəsində işçiyə məhkəməyə müraciət etməyəcəyi və hər hansı maddi (pul) tələbi etməyəcəyi barədə ərizəyə imza çəkdirirlər. Bu ərizədən belə çıxır ki, imza atan şəxs öz hüququnu müdafiə etmək üçün məhkəməyə müraciət edə bilməyəcək. Əgər məhkəməyə müraciət etsə, imzalanmış ərizə təqdim ediləcək və hakim həmin şəxsin tələbinə baxmayacaq. Bu tamamilə əsassız və qanunsuzdur. Ümumiyyətlə belə ərizələrin heç bir əhəmiyyəti yoxdur" - o söyləyib.

Billurə Yunus