Əgər kimsə tiktokda kimlərinsə qışqırışmasına baxıb əylənirsə... - Psixoloq

Yəqin ki, hər birimiz günümüzün xeyli hissəsini sosial şəbəkələrdə keçiririk. Bu zaman izlədiklərimiz hər zaman axtarışa verib seçdiyimiz kontentlər olmur. Sadəcə olaraq instaqram, yutub və ya tiktoka daxil olaraq qarşımıza nə çıxırsa onlara baxırıq və bu saatlarla davam edir.
Maraqlı məqam ondan ibarətdir ki, sosial şəbəkələrə milyonlarla izlənməsi olan videolar heç də öyrədici və ya elmi deyil.

Mövzu ilə bağlı Ölkə.Az-a danışan klinik psixoloq Fuad Əsədov deyib ki, öyrədici videolar ciddiyət və düşünmək tələb etdiyindən insanlar digər kontentlərə üz tutur:

“Ümumiyyətlə, müasir dövrdə sosial şəbəkələrin təsirinin artması ilə, bu qədər çox yayılması ilə və həmçinin kontentlərin müxtəlif və çox olması ilə əlaqədar olaraq belə bir situasiya yarandı. Sanki müxtəlif məzmunlu kontentlər istəməsək belə, həyatımıza özbaşına daxil olur. Məsələn, siz yutubda “shorts” videoya baxmısınız və sonra çıxmısınız. Yutuba daxil olan kimi yenə başqa “shorts” video açılır və ona baxırsınız. Sonra avtomatik barmağınız gedir və çevirə-çevirə digər videolara da baxırsınız. İnstaqramdakı “reels”lər və tiktok videoları da eyni qayda ilə davam edir. Bir nöqtədən sonra hansısa mənasız, sadəcə söhbət, qalmaqal ya da aşağı səviyyəli yumordan ibarət olan videolar istər-istəməz diqqətinizi çəkməyə başlayır. Və beləliklə siz bu cür videoların daha uzun versiyalarına baxmağa başlayırsınız. Çünki belə məlumatları bir dəfə beyninizə yaxın buraxdınızsa, artıq bunun qarşısını almaq mümkünsüz olur, bir axına çevrilir. Bunun müqabilində isə elmi videolar sizdən daha çox düşünməyi və ya daha ciddi olmağı tələb edir. Bu artıq əyləncə videosu deyil ki, gülüb əylənəsiniz. 

Gün ərzində insanın nə qədər düşünmək və nə qədər əylənmək istədiyinə baxsaq, hansı videoların daha çox baxılması təəccüblü olmayacaq”. 

F.Əsədov problemin səbəbini cəmiyyətimizdə elm ənənəsi olmamasında görür:

“Sadəcə buradakı məsələ odur ki, bizim cəmiyyətdə ümumiyytələ, elm ənənəsi yoxdur. Cəmiyyətimiz elmlə yenicə məşğul olur, elmi konfranslara, seminarlara təzə-təzə maraq göstərməyə başlayır. Buna görə də hələ ki mənzərə ürəkaçan deyil.  

İnsanların hər zaman əyləncəyə maraq göstərməsi normaldır. Sadəcə burada vacib olan bir insanın “əyləncə” adlandırdığı şeyin nə qədər keyfiyyətli olmasıdır.

Əgər bir insan tiktokda kimlərinsə mənasız qışqırışmasına, 2-3 nəfərin mənasız söhbətinə baxıb əylənirsə və buna çoxlu zaman sərf edirsə, bu, problem deməkdir. Çünki özü üçün daha yaxşı şeylər edə bilər, amma onu etmir”.

Billurə Yunus