“Vasmoy” bazarı bağlanır” xəbəri doğru çıxır? - Bəzi mağazalar qapadıldı
Xəbər verdiyimiz kimi, ötən ayın sonunda Bakıda “Vasmoy bazarı” kimi tanınan “8-ci km Ticarət Mərkəzi” MMC ləğv olunduğu elan edilmişdi.
Ölkə.Az xəbər verir ki, bu da sözügedən bazarın bağlanacağı barədə söz-söhbətlərə səbəb olmuşdu.
Nizami Rayon İcra Hakimiyyətindən isə bildirilmişdi ki, bazar fəaliyyətini davam etdirir, sadəcə, adı dəyişdiriləcək.
Bununla belə, bu gün Fövqəladə Hallar Nazirliyinin rəsmi məlumatında bildirilib ki, qurum Qara Qarayev prospektində yerləşən ticarət mərkəzlərində yoxlamalar keçirib və nöqsanlara görə bəzi obyektlərin fəaliyyətinin məhdudlaşdırılması ilə bağlı qərar verib.
Sözügedən ticarət mərkəzləri isə “Vasmoy” bazarında yerləşdiyindən buranın bağlanacağı barədə ehtimallar güclənib.
Ölkə.Az xatırladır ki, 2020-ci ildə “Nəsimi bazarı” adlanan ərazidə də analoji proses qeydə alınmışdı. Belə ki, ilk mərhələdə bazarın idarəsini həyata keçirən MMC ləğv edilmiş, daha sonra isə bazar özü sökülmüşdü.
Billurə
