"Bu biri qızları da "sındırmaq" çıxış yolu deyil" - RƏYLƏR

Paytaxtdakı 156 nömrəli tam orta məktəbin XI sinif şagirdinin 2023-cü ildə məktəbin IX sinfindən məzun olmuş qıza qarşı məktəbdən kənarda etdiyi bulinqi əks etdirən videogörüntülər cəmiyyətdə ciddi müzakirələrə yol açıb.

Ölkə.Az xəbər verir ki, birmənalı olaraq tənqid edilən hadisənin ilk dəfə baş vermədiyi bildirilib.

Jurnalist Nailə Balayeva: Videoya baxanda yadıma hələ beşinci sinifdə yaşadığım bir hadisə düşdü. Sinifimizdə Mehriban adlı qız oxuyurdu. Gülşən adlı da bir ataman var idi. Bu Mehribanın valideynləri boşanırdı, ailə uşağa ümumiyyətlə, fikir vermirdi. Bir gün həmin Gülşənin bu Mehribanın təxminən bu videodakı qızın başına gətirdiyi bir hadisəni gətirməsinin şahidi oldum. Məktəbdən qıraqda qızı qısnamağı bir yana, sinifdə də ona “bitlibaş” deyirdi. Hamı da baxıb gülürdü. Bu Gülşənin yeganə çəkindiyi adam mən idim. Bu qızı götürdüm himayəmə. Həm dərslərinə baxırdım, ələ salanlara da dedim: biriniz buna dəysəniz qarşınızda məni görün. Dediyim odur ki, belə hallar həmişə olub. Sadəcə, əvvəllər biz bunu bilmirdik, indi sosial şəbəkə sağ olsun, bilirik. Günah da valideynlərdədir. Uşaq dünyaya gətirirsizsə, yiyə durun, cəmiyyətə faydalı biri böyütməyəcəksinizsə, heç doğmayın. Valideyn olmaq məsuliyyətini dərk etmirsinizsə, olmayın! Aşağılayanın valideynini cəmiyyətə bir şeytan, aşağılananın ana-atasını isə bir kölə böyütməkdə qınayıram!"

Mətbuat Şurasının İdarə Heyətinin üzvü, jurnalist Hacıbəy Heydərli: "Məktəb vaxtı başa vurulan yumurta, böyüyəndə baltaya çevrilir. Hər iki halda günahkar valideyn, laqeyd qalan isə cəmiyyətdir. O cəmiyyət ki, yumurtaya kənardan baxıb, baltanı “qlazok”dan çəkir".

Aparıcı Nərmin Salmanova: "Videosu çəkilməyən, barəsində xəbər belə tutmadığımız o qədər bu cür məktəbli var ki... Aciz, arxalanacağı biri olmadığından tərbiyəsiz, psixi problemi olan, natamamlıq kompleksindən zəifi alçaltmaqla özünü güclü hiss edənlərin qurbanı olurlar. Məktəb ipə-sapa yatmayan, davranışını bilməyənlərə qarşı dözümsüz olmalıdır. Şikayət etməlidir, amma valideynə yox. Valideyni ondan yaxşı deyil, olmayacaq. Bacarsa, yalnız polis onlarla bacara bilər. 

Belələri üçün koloniya kimi xüsusi rejimli tədris ocaqları yaradılmalıdır. Sağlam insanlar deyillər. Üzərlərində çox ağır iş getməlidir ki, adam olsunlar".

Jurnalist, sabiq deputat Etibar Hüseynov: "Bu qəbildən olan videoları bir müddət əvvəl Avropa, Amerikada çəkib paylaşardılar. Sonra oxşarlarını qonşu Rusiyada, Türkiyədə etdilər. İndi isə özümüzünkülər edir. Komentləri oxuyuram: hamı DİN-i tağ edib dəhşət saçır. "Asılsın", "kəsilsin", "bunların da alnına təhqiramiz söz yazılıb, başları qırxılsın" və.s və i. Dəhşətə gəlirəm. Doğrudanmı bunu çıxış yolu sanırsız? Onsuz da ortada bir qızın, (həmçinin də ailəsinin) taleyi ləkələnib puç oldu. O qızcığaz canına qıymasa, ailə üzvlərindən hansısa biri qatilə çevrilməsə yaxşıdır. İndi istəyirsiniz, o biriləri də o günə salasınız? Bu biri qızları da "sındırıb" o birisindən də betər günə qoymaq çıxış yolu deyil. Bu həyata ilk qədəmlərini atan qızcığazlar yəqin ki, eynən o bayaq dediyim xarici videolarda olduğu kimi hansısa oğlanı "bölüşə" bilməyiblər. Adətən, bu qəbildən olan qızlar sevdiyi oğlanın başqa birisi ilə oturub-durduğunu eşidəndə bu yola əl atırlar. Yəqin ki, indi də eyni motivdir.

Ona görə də ya psixoloqlar, ya ağsaqqallar elə bir çıxış yolu tapmalıdırlar ki, bu gənclərin həyatı puç olmasın. Qarşı tərəfi də aşağılayıb təhqir etməklə zərərçəkmiş qızın yarası sağalmayacaq.

Əksinə, o biriləri də bədbəxt edəcəyik. Ona görə də elə variant tapılmalıdır ki, bu qızlar sonunda göz yaşları içində qucaqlaşıb barışsınlar. "Güclülər" zəifdən dönə-dönə üzr istəsinlər, etdiklərinə görə peşman olduqlarını söyləsinlər". 

Billurə Yunus